Guwahati, Naitung 16 : Ka ïingkashari Supreme Court ha ka sngi Baar kala ai da ka notis sha ka Sorkar Pdeng hadien la ioh pdiang da ka Writ Petition na ka Sorkar Nagaland.
Kane ka jingujor kadei halor ka jingkyntait jong ka sorkar pdeng ban pynshitom ïa ki 30 ngut ki shipai India kiba donkti ha ka jingjia ha ka 4 tarik u Nohprah, 2021.
Ha katei ka sngi, la kynnoh ba ka kynhun jong ki shipai kala siat ia kawei ka kali Pick-up kaba kit ia ki nongtih maw ha ka shnong Oting, shatei lam mihngi jong ka Nagaland, da kaba shim bakla ba ki dei ki lehnoh bad pyniap ia 6 ngut ki riew paidbah. Ki jingkulmar kiba la jia hadien kata kila pynlong ïa ki 8 ngut ki riew paidbah ban ïap haba la kynnoh ba ki bor pahara kila siat ia ki.
Kum ka jingkynthoh, ka ïing dorbar jong ka Nagaland, ha ka dorbar ba kyrpang, da kawei ka sur, ka la rai ban dawa ban weng noh ia ka AFSPA na Nagaland. Ka jylla ka la pyrshah ia ka rai jong ka sorkar pdeng ha ka 28 tarik u Rymphang ban kyntait ia ki jingpynshitom katkum ka ain jong ka Armed Forces Special Powers Act (AFSPA), 1958.
Ka ïingbishar kaba don lai ngut ki nongbishar ba la ïalam da u Chief Justice ka India u DY Chandrachud ka la ai por hynriew taiew ïa ka Sorkar Pdeng ban phah ïa ka jubab jong ka.
Ka sorkar Nagaland ka pynpaw ha ka dorkhas jongka, ba ka jingtohkit jong ki pulit ka Nagaland kala lum ia ki sakhi sabut, kaba la ialam sha ka jingpynmih ia ka Chargesheet.
Ha u Naitung 2022, ka Ïingkashari Supreme Court ka la pynsangeh noh ïa ka jingshah pynngat ha ki kam runar pyrshah ïa ki heh sorkar ba la shah kynnoh, da kaba kdew ba ym shym la ïoh ïa ka jingbit katkum ka AFSPA.
Ki jingpynshitom ki long kiba donkam katkum ka AFSPA, hynrei ka sorkar pdeng haduh mynta ka la kyntait ban ai jingbit.
