Shillong, Nohprah 20: Ka Coordination Committee on International Border (CCIB) hynne ka sngi kala pynpaw ba ka kam pyrshah iaka jingker sainar shiah ha ki thain khappud hynrei ka dawa naka sorkar ban ker sainar naduh Zero Line jong ki khappud bad ka jylla Meghalaya bad ka ri Bangladesh.
Haba kren sha ki lad pathai khubor u chairman ka CCIB u bah Sukkynjai Myrchiang u a ong ba naduh 3 tarik mynta u bnai ki bor sorkar kila wan shaka shnong Rhongkong ka ba hap haka thain Amlarem Sub Division ban sdang iaka jingker sainar wat hapdeng ka jingpyrshah ki paidbah khamtam ki trai jaka.
U bah Sukkynjai u la iathuh ba haka 5 tarik mynta u bnai naka liang ki dkhot ka Khasi Student Union (KSU), Hynniewtrep National Youth Front (HNYF) bad ka Federation of Khasi Jaintia and Garo People (FKJGP) kila leit shaka shnong Rhongkong ban phah sangeh ia kane ka jingker sainar shiah ka ba ki bor sorkar kila sdang ker naduh 150 Yard jong ka International Border.
“Haka jingleit phah sangeh iaka jingker sainar shah ki dkhot sengbhalang ki dap daka jinglyngoh ba ki bor sorkar kila iathuh ba kila ioh jingbit na u bah Wanshalan Dhar ban ker sainar namar ka sorkar kala dep ban siew bai lutksan sha u bah Banshalan bad sha ka ing jong u” la ong u bah Sukkynjai.
U bah Sukkynjai u la iathuh ba ka CCIB kadei ka kynhun ba don lang ki sengbhalang bad ki trai jaka ha ki thain khappud bad naduh ki snem bala leit kala pynpaw ka jingpyrshah ban ker sainar shah na 150 Yard ka International Border bad ka ri Bangladesh namar ki trai jaka kin duh iala ki jaka puta kiba dei ki jaka rep.
U la iathuh ba u bah Wanshalan Dhar bad ka ing ka sem jong u kila shet jylla iaka CCIB bad khamtam iaki trai jaka namar kila iaid lait iaka sur ban pyrshah iaka jingker sainar haki thain khappud.
U la bynrap ba naka liang ka CCIB naduh 21 tarik Nohprah 2021 kala ujor daka Petition hapoh Meghalaya High Court ban pyrshah iaka jingker sainar na 150 Yards na u pud sam ka Meghalaya bad Bangladesh hynrei ka sorkar jylla kala iaid shaid shaid ban survey bad ban ker sainar hapoh ka shnong Rhongkong.
U bah Sukkynjai u la iathuh ba ki don 147 ngut ki trai jaka ha ki thain khappud bad ka ri Bangladesh kiba naduh West Jaintia Hills, East Khasi Hills bad ha ki thain West Khasi Hills hynrei naka liang ka sorkar kam shym la burom iaka sur ki trai jaka.
