Shillong, Lber 07: U Myntri Rangbah ka Jylla Conrad K Sangma ha ka sngi Balang, ula ong ba ka Sorkar Meghalaya Democratic Alliance (MDA) kala pyndep ia 6 snem ka jingsynshar bad kala lah ban pyniaid khlem ka jingthut bad kaba bteng kumjuh ia ka roi ka par ka Jylla.
Haba iakren bad ki nongthoh khubor, u Conrad ula ong ba ka jingdap shisnem jong ka Sorkar MDA-2 kala iatyngkhuh bad ka jingdap 6 snem jong ka Sorkar MDA kata ka Sorkar MDA-1 bad MDA-2.
“Ka dei ka jingiaid lynti kaba sngewtynnad bha bad ngi la iohi ia shibun ki jingtynjuh ha ka lynti iaid, shibun ki jingeh ha baroh kine ki snem hynrei kum ka kynhun bad shibun ki jingiatreilang bad shibun ki jingshaniah bad shibun ki jingiatrei shitom, ngi la lah ban jop ia baroh kine ki jingeh bad wanrah ia ka Jylla ha ka lynti iaid kaba nga dei ban ong ba ka long kaba skhem bad ka roi ka par ba iaid kumjuh kumba ngi iohi mynta haba khmih ia ka ioh ka kot jong ka Jylla” ula ong.
“Ngi sngew ba ha kine ki 6 snem bala leit, ka nongrim bala suit la shor kan long mynta kaba kongsan tam na ka bynta ka roi ka par jong kawei pat ka kyrdan kaba ngin sa kynjoh ha kine ki khyndiat snem ban wan bad kumta ngi lah ap dik dik ia kane” ula bynrap.
U Myntri RAngbah ula shim ruh ia ka kabu ban ai khublei ia baroh ki paralok hapoh ka MDA kynthup ki Myntri Sorkar jong ka Sorkar MDA-1 bad MDA-2, ki seng sain pyrthei, kiba la iatreilang ban pynurlong ia kane, bad ka imlang sahlang namar ka jingiadon ryngkat bad ka Sorkar.
Haba pynpaw ba ki don beit ki jingtuh bad kin don beit ki briew, ki ban nym mynjur ia baroh kiei kiei kiba ka Sorkar ka leh, u Conrad ula ong “Kane ka dei ka jinglong ka riti synshar paidbah hynrei nga ong, ngi da kmen ban iohi ia ki kam kiba la dep leh, shibun kiba dang kwah leh bad ha ngi hi kumba nga la kren teng, kam dei satia tang ka jingdap snem, man ka sngi ka dei kaba kongsan ia nga. Nga kyrmen ba ngin nym syrwa kai ka por bad ngin iatrei bad pyntyllun shakhmat ia ka Jylla bad kaba kongsan eh mynta ka sngi ka long baka dei ka sngi ba kongsan ia ngi ban aiti biang ialade met bad mynsiem sha ka Jylla bad sha ki paidbah bad ban pynskhem ia baroh ki jingeh bad ki jingpyrkhat ba ngi don ha ka por ba ngi thaw ia ka Sorkar bad kut jingmut biang halade ban pynthika ban gin ialam shakhmat ia ka Jylla bad ki paidbah”.
Haba kylli halor ka Common Minimum Programme, u Myntri Rangbah ula ong “Ha ka jingjia ka Mission 10 ka dei hi ka Mimimum Common programme, hooid ka dei eh halor ka ioh ka kot hynrei bun ki bynta kiba ngi la pynleit jingmut ki dei ki ishu kiba mih bad shibun ki sienjam ba ngi la shim nalor kiwei kiwei ki ishu ha ka por jong ka Sorkar MDA-1 kaba ngi la pynbteng ia ki bad kine ki dei ki kam ba ngi la leh ban jam shakhmat. Ka jingkular ba ngi la ai ha ka Sorkar MDA-1, kine ki juh ki jingkular kin iai bteng bad ngin iai bteng ban kynjoh ia ki thong bapher bapher ba ngi la buh”.
 kala pyndep ia 6 snem ka jingsynshar bad kala lah ban pyniaid khlem ka jingthut bad kaba bteng kumjuh ia ka roi ka par ka Jylla.){kind=link}