Shillong, K’lyngkot 27 : Ka jingtei ia ka Iingdorbar Thaw Ain ba thymmai ha Mawdiangdiang kala jan dep artad ha kaba bun ki jingshna ba shabar kila dep bad ki jingshna ba shapoh ki dang iaid mynta, ong u Lamphang ka Iingdorbar Thomas A Sangma ha ka sngi Ba-ar.
“Ki jingshna ba shabar kila dep lut. Kumba phi lah ban ioh na shabar, kila dep, hynrei ki kam ba shapoh ki dang iaid mynta” ong u Thomas.
Ki kam ba shapoh ki kynthup ia ka jingpyndait ia ki Audio-Visual System, ki CCTV bad ki wiring.
Haba kylli ia ka por ban pyndep ia ka project, u Thomas ula ong “Ka jingbuhpor ban pyndep ha u Jylliew ka dang ieng mynta. Ngi la pyrshang kat kaba lah”.
Ula pyntip ba shen ka High-Powered Committee kan sa iakynduh shen ha Mawdiangdiang.
