Shillong, Nohprah 13: U Superintendent of Police (City) Dr D Aswaghosh, u la pyntip ba ki pulit ki dang tohkit ban tip, la ka jingshah thombor ka kali jong ka Myntri ka koit ka khiah Kong Ampareen Lyngdoh, ka dei kaba shu jia ryngkhat ne kaba leh da ka jingthmu.
Lah ban kdew ba ka kali jong ka Kong Ampareen Lyngdoh ka la shah thombor ha ki riew runar ki bym lah ban ithuh, ha ka 10 tarik Nohprah hadien ka Concert u Bryan Adam kaba long ha JN Stadium, Polo.
U SP City u Dr D Aswaghosh u la iathuh ba katkum ka ejahar ba ujor ha Laitumkhrah Police Station, katei ka jingjia ka la jia ha ka por 10:45 baje mynmiet ha Polo Junction katba ka Myntri bad ki bahaiing jong ka, ki dang wanphai na ka Concert u Bryan Adam.
“Kumba ka long mynta ngam pat lah ban iathuh ei ei hynrei la Register Case halor ka jingjia. Ngi dang tohkit ia katei ka jingshah thombor. Ngi hap ban eksamin lada u nongniah kali u la iohi ei ei shwa ban jia bad ngin sa peit lada don kino kino ki CCTV kiba don hajan ka jaka ba jia katei ka jingjia” la ong. U Dr D Aswaghosh.
U SP u la pyntip ba ka jingshah thombor jong ka kali ka Myntri sorkar ka dei tang kawei ka jingjia kaba sngewsih kaba la jia ha ka miet jong ka 10 tarik Nohprah.
