Shillong, Nailur 23: U Director General of Police (DGP) Dr LR Bishnoi hynne ka sngi thohdieng, u pyntip ba ka Tnad Pulit ka dang pynkhreh ban aiti ia ka jingbatai halor ki jingkynnoh (statement of allegation) ba iadei bad ka jingkynnoh pyndon kam bakla ia 29 tylli ki kali da u Assistant Inspector General of Police (A) Bah GK Iangrai.
“Ngi la dep aiti ia ka kaiphod ba bniah bha sha ka Tnad kam Pohiing. Ka Tnad kala bthah ia ngi ban aiti ia ka jingbatai halor ki jingkynnoh ha ryngkat bad ka thup ki kot ki sla, ki nongsakhi bad kiwei kiwei bad kane ka dang iaid ha ka jing pynkhreh mynta” ong u Dr Bushnoi haba iakren bad ki nongthoh khubor.
Ula ong ba shisien ba la dep aiti ia ka jingbatai, ka Sorkar kan sa rai ban shim ia ka sienjam ha kaban pynlong ia ka jingbishar ban pynshisha ia ki jingkynnoh kat kum ka kaiphod.
Haba kylli la une u Ophisar ba shah kynnoh ula shah wengkam shipor ne kumno, u DGP ula ong “Ym pat, lehse ka Tnad kam pohiing kan sa shim rai ia kaei kaba dei ban leh hadien bala dep ioh pdiang ia ka jingbatai ia ki jingkynnoh na ka Tnad MLP bad kiwei kiwei ki kot ki sla”.
Ha ka kaiphod, ka Fact Finding Team jong ka Tnad Pulit bala khlieh da u Inspector General of Police (Law and Order) MK Singh ula ong ba haduh 29 tylli ki kali ki dei kiba la pyndonkam da u AIG (A) GK Iangrai shuwa u Iaiong 2022 khlem kano kano ka hukum na ki bor ba halor.
Napdeng kine ki kali, kawei ka Scorpio thymmai, kawei ka Bolero thymmai, artylli ki Swift Desire thymmai bad artylli ki bike Bajaj ba thymmai, ki dei ki bym pat ai number namar ka jingbym lah pynbiang ia ki kot ki sla da u AIG. Nalor kata, bun na kine kk kali kim don satia ia ka BS VI standards bad namar kata, kim iahap satia bad ka jingbthah jong ka Ministry of Road Transport & Highway…kaba dei ka jingpynkhein ia ki kyndon.
Nalor kine ki kali haneng, haduh phra tylli ki Bajaj Pulsar 150 cc ba dang thymmai kiba la thied ha u snem 2019 ki dei ki bym pat register namar ka jingbym don ia ki kot ki sla.
Kawei ka Hyundai Verna kaba set ha Central Workshop ka dei kaba la pyndait da u nombor thok bad ym pat shym la register satia ia kane ka kali da u AIG namar ka jingbym don ia ki kot ki sla.
Nalor kata, la ong ba ia kine ki kali ym shym la ai pyndonkam ruh sha kino kino ki Ophisar bad namar kata la dei ban shu buh ia kine kii kali kum ki Pool vehicle lane ai sha ki Ophisar ne ki Unit.
Ka kaiphod ka ong b aka rukom leh jong u AIG(A) ha kine ki kam baroh ka pyni ia ka jingbym burom ia ka kam bad ka dei ruh ka jingleh ka bym iahap kum u Ophisar.
