Dang pynkhreh ka Sorkar ia ka DPR ban shna ia ka surok 4-Lane na Umiam sha Shillong

Shillong, Lber 04 : U Symbud Myntri Rangbah ba khmih ia ka tnad PWD (Roads) Bah Prestone Tynsong ha ka sngi Ba-ar ula pyntip ba ka Detailed Project Report (DPR) na ka bynta ka surok 4-Lane na Umiam (Barapani) sha Shillong ka dang don hapdeng ka jingpynkhreh da ka National Highway Infrastructure Development Council (NHIDCL).

Haba jubab ha ka kynta kylli jingkylli hapoh ka Iingdorbar, u Bah Prestone ula iathuh ba ia ka DPR bad ka sorjamin jaka la aiti sha ka NHIDCL da ka Ministry of Road Transport & Highway bad ka jingthung ia ki Consultancy la dep ban shim rai ha u bnai Naiwieng 2024.

“Ki consultant kila sdang trei ia ka kam bad nga thikna ba ia ka DPR yn sa dep ban pynkhreh shen” ula ong haba bynrap ba kane ka surok kan pynthikna ia ka jingkiew ka ioh ka kot bad pynduna ia ka jingeh ba mad da ki paidbah.

Ia kane ka kam la wanrah da u MLA ka UDP na Amlarem bad Myntri barim ka Sorkar Bah Lahkmen Rymbui, uba la kyrpad ia ka Sorkar ban bishar biang ia ka rai ban buh ia u pud ka pynieng (height limit) ba 2.80 m haba shah ia ki kali ba kit hapoh 9 metric ton ba kin iaid lyngba ka jingkieng Umiam.

U Bah Rymbui ula kyntu ruh ia ka Sorkar ba kan leh eiei halor ka jingkiew dor ki mar ki mata kaba ktah ia ki riew paidbah namar ba ki kali kit mar ki hap ban iaid ia ka surok ba jngai 80km ban poi sha Shillong ha ka jaka ba 20km lyngba ka Jingkieng Umiam.

U Bah Prestone ula pynshai ba ia u pud pynieng (height limit) la pynjari ban tehlakam ia kano kano ka jingjia ba sngewsih ka bym lah ban batai lypa ha kane ka jingkieng.

Ula kren ruh halor ki sienjam bala shim ban leh eiei halor ka jingkiew dor ki mar ki mata bad ong “Ngi la jan dep ia kawei ka project, ka surok VIP kaba dang pyntrei mynta ha ka jingjrong ba 23 km, ba pyniasoh ia ka Umroi Airport. Yn sa pyndep ia ka haba kut jong une u snem. Shisien bala pyndep ia kane, ki trok kit mar khia ki lah ban iaid na kane ka surok sha Shillong. Kumjuh ruh, ka surok na Mawdiangdiang ba pyniasoh ia ka Shillong bypass watla ka jingjngai ka kham bun hynrei ki briew ki lah ban pyndonkam ia ka ban kiar iaid lyngba ka Jingkieng Umiam.

U Bah Prestone ula pyntip “ka surok 4-lane kan sdang naduh ICAR bad kan iaid lyngba ka jaka ka MeECL bad kan hiar sha Industrial Estate bad sharum jong ka jingkieng Umiam ba mynta bad ka sorjamin jaka kan poi haduh ha Marten bad yn sa pynkut ia ka hajan ka Jingkieng Umshyrpi. Kane ka surok ha baroh shilynter la tyrwa ba kan dei ka surok ban pyniaid najrong”.

Halor ka jingiaid jong ka kam Shillong Western bypass, u Symbud Myntri Rangbah u pyntip ba kane ka project kala iaid shaid shaid.

“Nga sngewtynnad ban pyntip sha phi ba ia kane ka project yn sa pyndep hapoh ka por bala buh bad ka jingiaid jong ka kam mynta ka long kaba ihun bha” ula bynrap.