Shillong, Lber 17 : Ka Sorkar Jylla ka dang pynkhreh shaid shaid ban thied ia ki jaka ban pynkylla kum ki jaka theh niut ha kylleng ki District ka Jylla.
Ka Sorkar kala ithuh ruh ia ka jaka ha Nonghali, East Khasi Hills bah eh haduh 112 acre ban pynlong jaka theh niut ka Nongbah Shillong.
Ka Sorkar kala thung ia Consultant ban pynkhreh ia ka Environmental Impack Assessment (EIA)/ Environmental Management Plan (EMP) bad ban ioh ia ki environmental clearance ban shna ia ka Integrated Scientific Solid Waste Management Facilities, ka ban long ka jaka theh ia u niut ba mih na Shillong bad ki shnong ba markhap.
Kumba long mynta ka jaka ha Nonghali ka dei kaba la pyndep ia ka survey bad ka jingaplai ia ka environmental clearance kala iaid shakhmat.
Ia kane la pyntip da u Symbud Myntri Rangbah ka Tnad pynroi sor bah Sniawbhalang Dhar ha ka jubab bala wanrah ha ka Dorbar Mang Tyngka ba dang shu kut jong ka Iingdorbar Thaw Ain ka Jylla.
Haba phai sha ka Jowai, West Khasi Hills, ka Sorkar kala ithuh ia ka jaka ha Umalamat Eleka, Jowai bad ka jingleh ia ka EIA/EMP kala sdang mynta. Katba ha Tura, West Garo Hills, ka Sorkar kala dep thied ia ka jaka ha Wakkagre bad kala sdang ia ka EIA/EMP bad kumjuh ruh ia ka Williamnagar ha East Garo Hills, kala dep thied ia ka jaka ha Rongakgre bad ka jingleh ia ka EIA/EMP kala iaid shakhmat.
Haba phai sh Resubelpara, North Garo Hills, Baghmara, South Garo Hills bad Nongstoin, West Khasi Hills, ka Sorkar kala ioh pdiang ia ki jingtyrwa jaka bad ka Tnad Urban Affairs kala bthah ia ka Task Force ba kan aiti ia ka kaiphod jingwad bniah halor ka jinglong ka jaka.
Katba ha Nongpoh, Ri-Bhoi, la ioh pdiang ia ka jingtyrwa bad ka Task Force kala pyndep ia ka jingjurip.
Ha kajuh ka por ban pynjanai ia ka kam lum niut, ka Tnad kala thied haduh 71 tylli ki kali lum niut na ka bynta ka Shillong Municipal Board bad na ka bynta ki 37 tylli ki Dorbar Shnong hapoh ka sor Shillong.
Haduh 51 tylli ki kali lum niut kila don mynta ha kiwei kiwei ki jaka sor jong ka Jylla Meghalaya.
