Shillong, Naitung 11 : Ka kyrteng jong ka Meghalaya sa shisien kala shah pynthohbria da ki jingkam ba khlem nongrim na u nongwei lehse u bym pat ju wan iuhkjat ha Jylla-uba kynnoh ba don ka Shnong hangne ha Meghalaya kaba dang “Knia briew” bad “Bam dohbriew”.
Kane ka jingpynthohbria kala mih na uwei u sadhu uba kyrteng u Sushil Guru, uba kam ba ula ka don ka jingshemphang ba palat 40 snem ha ka jingpeit nusib (astrology) bad tantra.
Ha kawei na ki podcast bala thep ha YouTube Channel “Supertalks by themovingship” ha ka 13 tarik Jylliew, haba iakren bad u nongkylli jingkylli Raghav Sharma, une u sakhi ula kynnohba ha kane ka shnong ba khlem jer kyrteng bad ba sah tang da ki riewlum, ki briew ki dang bteng ban “Knia briew” bad wat ban bam ia ka doh kum shibynta na ka jingleh niam.
“Ki ngeit ba ka jingknia briew ka pynkmen ia ki Blei. Ki briew ki ju leit sha ka jaka knia kum shibynta na ka jingleh niam, saw ngut ki lah ban leit hynrei tang lai ngut ki ju wan phai” ula ong ha ka podcast.
Une u nongpeit khlur ula kam ruh ba ia kine ki jingknia la leh ruh ha ka rukom kaba heh bad kum ka jinglehkmen, ha kaba ki nongshongshong ruh kila shim ia ka jingknia kum ka kamram ha ka jaka ka kam bymman. “Ki dei ki riewlum, bad ki bam doh briew. Ha ki, ka dei ka jingaiti, ym ka kam pyniap” ula bynrap.
Ha kane ka podcast, kila iakren ruh halor ka subject tantra, black magic bad kiwei kiwei.
Kane ka podcast ka dang don ha ka channel bad ki nongpeit kila kot palat 47000 ngut, kaba la pynmih ia ki jingkynthoh ba lai phew jait haki jaka kynthoh bala buh. Don katto katne kiba la niew ia une u nongpeit khlur kum u riewthok riew shukor hynrei don ruh kiba ngeit ba u kren ia kaba dei.
Kane kam dei ka sien kaba nyngkong ba ka Meghalaya kala shah pynthohbria. Ha ka jingjia ba dang shen, ka Jylla kala shah khein kum ka jaka ki kam bymman bad ruh ki jingkam ba ka dei ka jaka kaba jur ka khaii dkhot met ki briew da ki trai shnong. Ia kane ka kam la shu kdat noh sharud tang da ka jingpanmap.
Hynrei ka jingkylli ka mih mynta, hato ka Sorkar Jylla kan shim ia kano kano ka sienjam pyrshah ia une u sadhu ne hato tang sa kawei ka jingpanmap kala biang eh.
