Shillong, Nohprah 02 : U Myntri Rangbah ka Jylla Conrad K Sangma, pynpaw ba kam pat iahap ban iakren halor ki jing pynman shaphang ka jingthmu pyniasoh NPP u nongialam ka UDP Bah Paul Lyngdoh da kaba ong ba ka dang kloi palat mynta ban kren kut ia kane ka kam.
“Ngi dei ki paralok ba iajan bha, ngi ju iakren lang ia ki kam sain pyrthei…..nga sngew ba ia mynta ban shu kren kut ba un sa wan pyniasoh, nga sngew ba ka por ka dang kloi palat. Kam pat dei ka por kaba iahap ban iakren ia kine kiei kiei” ong u Conrad haba bynrap ba kum kine ki jingiakren ki dei kiba ju jia beit ha ka kam sain hima sima.
Kane ka jingkynthoh u Conrad kala mih halor ka jingmih khubpr ba u Bah Paul u lah ban leit iasoh noh sha ka NPP, hadien ka jingbujli shuki Myntri ha u bnai Nailur 2025, namar ka jingshah weng na ka shuki kum u Myntri kam jngohkai.
Ha kane ka jingbujli Myntri, haduh phra ngut ki Myntri kila shah weng na ka Kynhun Myntri kynthup u Bah Paul Lyngdoh bad phra ngut ki dur thymmai kila rung hapoh ka Kynhun Myntri.
U Conrad ula ban jur ba ka kam sain pyrthei ka kynthup ia ki jingiakren bad jingiasyllok bad haba kut, ia ki rai yn sa pyn paw ha ka por kaba dei.
“Shibun kiei kiei kiba jia ha ka sain hima sima. Dang shen ki don ba ong ia nga ba katto katne ki MLA ka NPP ki thmu ban iehnoh bad nga la kylli na phi ha katei ka por ba sngewbha ai ia ka kyrteng jong kine ki MLA, ngan iakren ia ki bad pynsngewthuh ba kin nym mih. Kum kine ki jia ha ka kam sain pyrthei, ki don shibun ki jingiakren bad jingiasyllok kiba jia hynrei haba kut ka sngi, to ngin iapeit ia kaei kaba jia bad ynda lah poi kata ka por, ngin sa pyntip sha phi” ula bynrap.
