SHILLONG, Nailur 5: U Myntri Sorkar ba peit ia ka tnad pule puthi u Rakkam A Sangma u la kular ba ka sorkar jylla ka dang bishar bniah ia ka jingtyrwa ban pynkiew tulop ia ki nonghikai, ynda ka jinglong jingman ha kaba iadei bad ka pla tyngka kala bit la biang.
Kane ka jingkynthoh ka jong u kala wan, hadien ba ka Federation of Adhoc School Teachers of Meghalaya (FASTOM) dang shen kala pynbna ba kan mih biang sha surok ban pynlong ka jingiakhih pyrshah ia ka sorkar jylla halor ka jingbym lah ban kyntiew ia ka tulop jong ki nonghikai adhoc hapoh ka jylla.
Haba jubab ia kane, u Sangma u la ong ha ki nongthoh khubor ha ka sngi Thohdieng ba ka sorkar jylla kam don jingbah khlieh ban siew ia ka tulop jong ki nonghikai ha ki skul grant-in-aid.
Katkum ka jingong u Rakkam, kine ki skul kidei ba la seng bad sdang da ki School Managing Committees (SMCs), kiba long trai ia ka iing skul bad ka jingthung ia ki nonghikai.
“Ka sorkar ka shu ai jingiarap lyngba ki grant-in-aid ban kyrshan ia ka tulop ki nonghikai, hynrei ka SMC kidei ban don ka jingbah khlieh ban rai ha kaba iadei bad ka jingsiew tulop ia ki nonghikai… ka dei ruh ka kamram jong ki SMC ban pynkiew ne ban siew ia ka tulop jong ki,” u la ong.
“Hynrei haba ka jinglong jingman ha ka liang ka pisa tyngka kala bit la biang,
ka sorkar ka dang wad bad bishar bniah ïa ka jingtyrwa ban pynkiew ïa ka tulop. Kane ka dei ka jingdawa jong baroh ki jait nonghikai ha kylleng ka jylla.Lada ngi rai na ka bynta ki nonghikai adhoc, ki nonghikai SSA ruh ki don haduh 14,000 – 15,000 ngut, te kan ym lah ban long ban shu rai lang ia baroh namar ba ka jinglong jingman ha kaba iadei bad ka pla tyngka kam biang,” ong u Sangma.
U Myntri ula kyrpad ïa ka FASTOM ba kan nym ïaid shakhmat ïa ka jingthmu ban iakhih, u Rakkam u la ong, “Namar ba ka sorkar ka dang wad ki lad ki lynti kumno ban kyrshan ïa ki. Katba ka jinglong jingman ha ka liang ka pisa tyngka ka la bit la biang, thikna ba ka sorkar kan bishar bniah ïa ka jingtyrwa ne dawa jong ki nonghikai.”
