Shillong, Naiwieng 18 : U Myntri ka Koit ka Khiah Bah Wailadmiki Shylla ula pynpaw ba u dang ap ia ka jingai jingbatai na ki Ophisar haba iadei bad ka rukom treikam jong ka Emergency Service 108 hapoh ka Jylla.
Haba kren sha ki nongthoh khubor, u Bah Shylla ula ban jur ia ka jingpyrshang jong ka Tnad ban wanrah ia ka rukom treikam ka ban lah pyniaid bha ia ka jingshakri ka 108.
“Ngi dang ap ia ki jingai jingmut bad ki Ophisar kila pan katto katne por ban pynkhreh ia ki jingbatai ba kumno yn pyniaid ia ka Emergency Service 108 ha ka Jylla. Hadien ba nga la khmih ia ki jingbatai, ngan sa pyntip sha phi” ula ong.
U Myntri ula kular ruh ba ka Tnad kala kut jingmut hok ban ai ia ka jingshakri kaba kham bha sha ki paidbah jong ka Jylla.
Haba kylli ia ka jingthmu ban aiti pyniaid ia ka Emergency Service 108 sha ki kompani shimet, u Bah Sylla ula jubab “Ngam pat ioh ia kano kano ka jingtip ba bniah halor kane ka kam, hynrei ngin pynleit jingmut ba kumno ban pyniaid bha ia kane ka jingshakri na ka bynta ka jingmyntoi jong ki paidbah ka Jylla”.
