Shillong, Kyllalyngkot 07: U Chief Secretary ka jylla u Bah D.P. Wahlang ula ong ba ka sorkar jylla kala leit kyrpad ia ka sorkar pdeng ban ai iaka jaka jong ki shipai kaba don hajan ka Mawlonghat, na ka bynta ban pynkynriah ia kiba shong basah ha Them Metor.
“Ka jinglong jingman mynta ka long ba ngi lah dep kyrpad ia ka sorkar pdeng ban aiti ia ka jaka kaba rit bad kaba lait hajan Mawlonghat. Kane ka jaka kadei kaba longtrai da ki shipai bad ngi lah dep pyntip sha ka Ministry of Defense. Shisien ba ngi lah ioh pdiang ia ka jubab, ngin sa iaid shakhmat” ong u Bah DP Wahlang hynne ka Sngi Baar.
U Chief Secretary ula pynthikna ruh ba ka sorkar jylla kala shimkhia bha ia katei ka mat.
“Ha u bnai Nohprah u Myntri Rangbah ka jylla ryngkat bad u Commissioner Secretary ka Tnad Urban Affairs kila leit sha ka Defense Ministry ha Delhi shwa ka shuti Khristmas ban buddien halor katei ka kam. Ka rai mynta kan shong ha ka Defense Ministry. Ngi don ia ka jingngeit ba ki dang iatai bha halor ka jingkyrpad bad ki ophisar ki jongka kiba don ha Delhi bad Shillong,” ula ong.
U Chief Secretary ula pynpaw ruh ba ka jingiakren bad baroh kiba donbyntalang ha ka kam kaba la long ha u Naiwieng kala long kaba seisoh ia kaba ula pynpaw ia ka jingkhmih lynti ban lah ban pynurlong ia ka jingthmu ban pynkynriah.
“Ngi la pynlong ia ki jingiakren bad kiba donbyntalang bad kila mynjur ia ka jingtyrwa. Kaba kongsan ka long ba ha ka jingpynkynriah la pynthikna ba ka Gurudwara bad ki jaka mane Blei kiba don ha katei ka jaka, kin ym shah ktah. Lada ioh ia ka jingmynjur, kan long ka jingioh nong ia baroh kiba iadonbyntalang ha ka kam” ong u Bah DP Wahlang.
Haba jubab halor ka jingtyrwa ia ka jaka, u Bah DP Wahlang ula ong, “Ia mynta hi, ngi lah tyrwa 2 akar ka jaka, hynrei ia katei ka jingdonkam lah ban pynduna noh mynta sha ka shi akar bad ban ialeh ban pyndonkam pura ia katei ka jaka kat kaba lah”.
Kam shym la don kano kano ka jingbuh por ban pyndep ia ka jingpynkynriah hynrei u Chief Secretary ula ong ba ka sorkar ka iengskhem ha kaban pynurlong ia katei ka jingthmu bad ka sorka ka dang iai buddien bad ka sorkar pdeng bad kam shym la don satia kano kano ka jingbuh por bad haba kino kino kiba mihkhmat ia ka jylla ki leit sha Delhi ki ju leit ruh ban buddien ia katei ka kam.
