Shillong, Kyllalyngkot 07: Ka Dorbar ki Rangbah Kur ka Bri Hynñiewtrep hynne ka Sngi Baar kala pynlong ia ka jingrakhe ia ka Lyngkhuh jingdap San Snem jongka Synjuk Ki Rangbah Kur: Ka Bri u Hynñiewtrep.
Ha ka ne ka jingrakhe la wan ban iashimbynta da u Chief Executive Member ka KHADC u Bah Pyniaid Sing Syiem ha ryngkat ka jingdonlang u Syiem ka Hima Khyrim u Paiem Dr Balajied Sing Syiem, u Syiem ka Hima Mylliem u Paiem Ainam Manik Syiem, kiwei kiwei ki syiem, ki Lyngdoh jong ki Hima, ki Doloi jong ki Elaka, bad ki khlieh synshar shnong na kylleng ki shnong ki thaw.
U Bah Pyniaid Sing Syiem ula kren sani halor ka riti tynrai ba dei ban thawaiñ ha ka KHADC na ka bynta ban pynkup bor ia ki shlem synshar bad shlem dalariti ha ka jylla bad ban teh lakam na kino kino ki riewshimkabu kiba khwan myntoi bad rhah ban iohnong sha lade da kaba kyrsum ha ki kyndon riti tynrai.
La ioh ruh ia ka jingkren na i Kong (Dr) Streamlet Dkhar, u Paiem Dr Balajied Sing Syiem bad u Paiem Ainam Manik Syiem.
La pyllait paidbah ruh ia ka kotsahnam jingrakhe lyngkhuh san snem ba la thoh da u Bah Raphael Warjri bad la pynkup burom ha ka nam jong u Khlieh Rangbah ba nyngkong duh, u Bah HS Shylla da kaba ai takma sahnam sha ka longiing longsem ba la mihkhmat da i kmie ki khun bad i khunkynthei.
Hadien kane, kala don ka jingiamir jingmut kaba la pyniaid da u Bah Erwin K Syiem Sutnga bad la ioh ia ka jingkren na u Bah Rapionglang Blah, u Bah R S Khardewsaw ba la pule ia ka jynthoh da ka longkmie Dr. MRP Lyngdoh, bad ka jingkren lyngkot shaphang ka longkur longkha.
