Shillong, Nailur 20 : U Myntri Rangbah ka Jylla Conrad K Sangma hynne ka sngi Balang, ula iathuh ba ka Sorkar Jylla ka dang ap ia ka jubab na ka Sorkar Pdeng halor ka resolution bala mynjur da ka Iingdorbar Thaw Ain ka Jylla ban pyntrei kam noh ia ka Inner Line Permit (ILP) hapoh ka Jylla.
“Ka Sorkar Jylla kala buddien khlem shongthait bad ka Home Ministry halor ka kam ILP bad ka Jylla ka dang ap ia ka jubab na ka Sorkar India halor kane ka kam” ong u Conrad hapoh ka Iingdorbar Thaw Ain.
Haba jubab ia ka Zero Hour Notice, u Conrad ula pyntip ba ka Kynhun ba u ialam na Jylla, kala iakynduh ruh ia u Myntri Rangbah Duh ka Ri Narendra Modi ha New Delhi myn ha ka 8 tarik Nailar, ba kyrpad ia u ban tuklar lang halor kiba bun ki ishu ba dei jong ka Jylla kynthup ia ka jingpyntreikam noh ia ka ILP.
Ula iathuh ba ka Sorkar Jylla kala aiti ruh ia ka dorkhas halor kane ka kam (ILP) sha u Myntri kam Pohiing ka Ri Amit Shah ha ka jingwan iuhkjat jong u ha Jylla ha u snem 2021.
U Conrad ula ong ba ka jingdawa pyntreikam ia ka ILP kala nang sawa jam ha Meghalaya hadien ba ka Sorkar Pdeng kala ai jingmynjur ia ka Citizenship Amendment Act (CAA).
Namar kane, ka IIngdorbar Thaw Ain ka Jylla kala mynjur ia ka resolution ban pyntreikam ia ka ILP ha u snem 2019. Ia kane ka resolution la phah sha ka MHA ha ka 23 tarik Nohprah, 2019 bad la pynbud da ka shithi pynkynmaw ha ka 17 tarik Baiwieng, 2020.
