SHILLONG, Naiwieng 10: Ka tnad ka rep ka riang jong ka sorkar jylla haduh mynta ka dang ap ban ioh ia ka jingmynjur na ka tnad Ministry of Chemical and Fertilizers ka sorkar pdeng na bynta ban pynpoi ia ki sboh dawai Urea ha kane ka jylla.
Lah ban kdew ba ka sorkar jylla ha ka 9 tarik u Nailar,2022 ka la pynmih ia ka hukum ba la shah ban pyndonkam biang ia ki sboh dawai Urea na bynta ki nongrep kiba rep ba riang ha kane ka jylla.
Ha ka jingiakren bad u Assistant Director ka tnad Agriculture & Fertilizers u bah Victor Kharbuki, u la iathuh ba na ka liang ka tnad ka ladep phah ia ka shithi ban mang halor ka jingdonkam ka jylla ia kane ka sboh Urea sha ka tnad ka sorkar India hynrei haduh mynta kim pat shym la ioh pdiang ia ka jubab ne ka jingmynjur.
“Ha ka 16 tarik Nailar u Secretary ka tnad kam rep riang ka sorkar jylla ladep phah ia ka jingthoh sha u Joint Secretary ka sorkar India ba khmih ia ka tnad Chemical & Fertilizers ban ai ia ka jingmynjur ia ka jingdonkam jong ka jylla ia ka dawai sboh Urea bad ngi pan na bynta ki jingthung kiba rep ha ka por tlang (Rabi Season). Hynrei haduh mynta ngim pat ioh bad ngi dang ap ia ka jingmynjur na ka tnad,” la iathuh u bah Kharbuki bad bynrap “ Ynda ka tnad ka rep ka riang ka sorkar India ka la ai ia ka jingmynjur kan sa phah sha ka sorkar jylla bad sha ki kompeni ban suplai shane ia ka sboh Urea kum ka IFFCO bad ka BVFCL.”
Katkum ka jingiathuh u Assistant Director ka tnad Agriculture & Fertilizers u bah Victor Kharbuki, u la ong ba la thoh ba ka jylla ka donkam 2500 metric ton ka dawai sboh Urea, 2000 mt ka SSP, 500 mt ka MOP, 1000 mt ka DAP bad ka NNPK donkam 500 mt.
U bah Kharbuki u la iathuh ruh ba ha ka 28 tarik Risaw, 2022 ka tnad lyngba ka Director ka Rep ka riang ka ladep phah biang ia ka shithi ban pynkynmaw ban ioh ia ka jingmynjur.
