Nongstoin, Rymphang 15: Ka Hynniewtrep Youths Council West Khasi Hills District ha ka sngi balang, ka la pynlong ia ka jingsam ia ki kot lyngkdop jong ka seng ia kaba lah tip kum ka ‘Rai eh daw Campaign’ ha iew Nongstoin ban pynsngewthuh ia ki paidbah ba kin jied ia ki Nongmihkhmat da ka jingkitkhlieh naka bynta ka jaidbynriew ym ban ngop ha ki tyngka pliah bad ki jingpynbyrngia ki kyrtong.
Ka jingthmu jong ka HYC, ka long ban hikai ia ki paidbah nongshong shnong, kumno ban khein kor ia ka jingthep vote lane ia ka shi vote ba kin ai ha ka 27 tarik khnang, ba ka pateng ban wan kan long kaba phyrnai ia ki khun ki kti khamtam ia ka ri bad ka jaidbynriew.
Ka seng ka kyntu ban ym pynlong ia ka jingjied ia ki nongmihkhmat tang kum ka tamasa, ban shongshit lyngba ka jingkhawai bam, khawai kyiad bad ka shad khlem nongrim. Hynrei ka dei ka por ban rai ban weng noh ia ka jingsynshar bym hok ban wanrah ia ka synshar khaddar kaba khuid, kaba shai bad kaba beit.
La kyntu ruh ia ki paidbah ban pynshong nongrim ia ki mat ki jura jong ka Jaidbynriew ha shwa ban thep vote, kum ka jingpyntrei noh ia ka Inner Line Permit lane ia ka MRSSA (Amendment Bill), ban ithuh noh ia ka Ktien Khasi ha ka Riti synshar jong ka Ri India, ban pynduh noh ia ka ain khalai Casino ia kaba ka sorkar ka la shu wanrah tang ia ka Ordinance, ia kaba kane ka ain kan im biang hadien hynriew bnai, kumta kan long ka jingma.
U Samla Wanteibok Lyngdoh secretary ka seng, u la kyntu ia ki paidbah ba haba ki ioh ia kine ki kot lyngkdop, kim dei ban khein dew thala hynrei da pule bad puson janai haiing ar sien lai sien bad da pynshong nongrim haba ki pule, khnang ba kin sngewthuh shai ia ka jingdonkam jong ki ban ai ia ka rai ha ka 27 tarik.
