Nongpoh, Kyllalyngkot 14: Kum shibynta ban kner ïa ki kti jong ka jingisynei bad ruh kum ka jingkitkhlieh ban peit lem ïa kito kiba donkam ïa ki lad jingïarap bad kum shibynta naka jingai sngewbha snem thymmai, ka Hynñiewtrep National Youth Front, Women Wing Umling Circle mynta ka sngi ka la sam ia ki jaiñ syaid (Blanket) sha ki palat 36 tylli ki longïing baduk kiba shong ba sah ha ka shnong Sohkhwai, Ri Bhoi District.
Ïa kane ka prokram la pynshngaiñ lang da ka jingïadonlang ka kong Rihun Namsaw President, ka kong Bitterly Doloi Secretary, ka kong Phrinsibon Kharmuti Secretary ka Womens Wing sengkmie, u Bah Edilbert Nongrum Secretary ka Northern Region, Bah Sylvester Shangpliang bad kiwei kiwei ki riew rangbah bad nongïalam shnong.
Haba kren ha kane ka prokram, ki nongïalam ka HNYF Women Wing, ki la pynpaw ïa ka jingkmen kaba khraw ban ïoh ïa kum kane ka lad ban pynphriang ïa khubor jong ka jingieid, jingkitkhlieh da kaba phaikhmat lem sha ki jingeh jong ki longïing baduk ban kner ruh ïa ki lad jingïarap kum ka jingai sngewbha na ka bynta ban pdiang ïa u snem thymmai u ba suk ba kmen bad u ban dap pahuh pahai.
“Kum ki sengbhalang kiba don ka thong ban shakri paidbah ki dei ban don ruh ïa ka jingkitkhlieh ban peit lem ïa ki jingdonkam bad ki jingeh jong ki paidbah bad ruh ban phaikhmat ban ïaleh katba lah ban shakri ïa u paidbah”, pynpaw ki nongïalam.
