Shillong, Lber 27: Ka Sorkar Jylla kala rai ban thaw ia ka Task Force ban khmih ia ki mat kiba iadei bad ka nongri syiar ha ka jylla.
Ia kane la pyntip da u Myntri Sorkar uba khmih ia ka tnad Animal Husbandry & Veterinary u Bah AL Hek hadien ka jingialang bad ka kynhun jongka Meghalaya Poultry Farmers and Welfare Association (MPFWA) hynne ka sngi Palei.
“Ka sorkar kan sa thaw ia ka Task Force (ban khmih ia ki mat kiba mad jingeh da ki nongri syiar),” ong u Bah Hek haba iakren bad ki nongthoh khubor.
“Kiei kiei ki jingeh kaba ki mad, kidei ban wanrah sha ka jingtip jong katei ka Task Force,” ula ong.
U Bah Hek ula pyntip ruh ia katei ka kynhun ba kam don kano kano ka jingpang ‘Bird Flu’ bad katei kaba ki kren kadei kaba kila kdew ia kaei kaba la jia ha u snem 2019-2020 ha Haryana bad kam dei satia kaba la jia dang shen.
“Lada kadei kaba la jia dang shen, ngin ioh ia ki jingtip kum ka sorkar bad ka tnad kan ym sngap jar, ngin shimkhia mardor ia katei ka jingpang, kaba jia shabar jong ka jylla Meghalaya,” ula ong.
Kham hashwa kane, haba iakren bad ki nongthoh khubor, u dkhot jong ka Association u Bah William Diengdoh ula ong, ba ka seng kala pynpaw ia ka jingsngewkhia ia ka jingpynrung ia ki syiar kiba nabar ka jylla khamtam eh na ki jaka kiba la pynbna ba ki syiar kidei kiba la ioh ia ka jingpang (bird flu).
Haba kdew ia ki khubor kiba la mih, u Bah Diengdoh ula ong ba kala don kawei ka kali kaba la lap ba kila wanrah ia ki syiar na ka jylla Haryana, Punjab, kaba dei ka jylla kaba la dep ban pynbna bad ia kitei ki syiar la lap noh mardor bad ym shim la shah ia ki ban pynrung shapoh ka jylla.
“Da kaba shim ia katei, ngi nga la wan sha ka sorkar jylla ban dawa ba ia mynta shipor ban khang noh shwa shipor ne Temporary Ban ne kino kino ki kyndon, hynrei ngi sngewthuh ba kane kan ym lah ban treikam bad ka sorkar kala rai ban thaw ia ka Task Force ban khmih ia ki jingeh bad ban pynthikna ban jurip bniah katkum ki SOP kaban long katkum ka National Action Plan, ia kaba la dep ban phah da ka Sorkar Pdeng” ula pyntip.
“Kala don lypa ka SOP bad ngi khmih lynti ba kin pyniaid noh shakhmat ban pyntreikam ia katei ka SOP. Shisien ba la pyntreikam ia katei ka SOP, kumta ki briew kiba wanrah ia ki syiar nabar ka jylla kin ioh ban bud ryntih lane kin ioh ban bud ruh ia ka Motors Vehicle Act katkum ka Prevention of Cruelty to Animals bad katkum ka Transportation of Livestock Rules bad lada la pyntreikam ia kine kiei kiei baroh, ngi kyrmen skhem ngin lah ban tehlakam” ula bynrap.
U Bah Diengdoh ula pynpaw ia ka jingsngewkmen ia kaei kaba mih na ka jingialang hynrei ki kwah pat ban ioh ba dei ban pyni noh da ki kam.
“Ka sorkar kan sa thaw ia ka Task Force mardor bad kin don ruh ki dkhot ki jong ngi kiban long kum ki dkhot jongka Task Force khnang ba ngin lah ban pynsngew ia ki jingduna ne jingdkoh kiban mih ha ki sngi kiban wan bad ngi khmih lynti ba lada mih kino kino ki jingduna yn lah ban shimkhia noh mardor bad ka sorkar kadei ban lah ban pynbeit noh ia ki” ula ong shuh shuh.
