Dibrugarh, Naitung 06: Kum ka dak ban ai khublei ïa ki paidbah, ki heh ophisar ka tnad Forest ka District Tirap jong ka Arunachal Pradesh ki la ai khusnam pisa kaba T.10,000 sha ki nongshong shnong kiba la shimkhia ban pynlait im ïa u khun hati khlaw uba hap ha ka thliew kaba jylliew ha Deomalibha.
Ka jingpyllait im, kaba la pynlong da ka tnad Forest Deomali, ka la long kaba lah lyngba ka jingïarap bad ka jingïatreilang jong ki nongshong shnong ban pyllait im ïa une u khun hati.
Ka jingiarap jong ki nongshong shnong ka la iarap ban pynlyngkot ia ka jingtrei tang ar kynta, kaba la kut da kaba la ialam suk ia u hati ba dang rit ban leit phai biang shapoh khlaw.
Mar ia ioh ia ka jingtip shaphang u Hati ba ula hap ha ka thliew ha ka 5 tarik u Naitung, ka kynhun kaba la ialam da u Range Forest Officer (RFO) u Diwang Lowang hapoh ka jingpeit jong u Divisional Forest Officer (DFO) Deomali ki la hiar sha katei ka jaka.
Kane ka kynhun ka kynthup ïa ki nongap khlaw u Kaling Libang, u Leamkai Wangpan, u Leki Ingo, u O.P. Singh bad kiwei kiwei ki nongtrei ka tnad.
“Kum kane ka jingiatreilang kaba biang por na ki nongshong shnong ka dei kaba pynkhlain ia ka jingiada ia ki mrad khlaw ha madan”, la ong u RFO Lowang, uba la aiti hi dalade ia ka khusnam kum ka jingaikhublei.
Ki heh ophisar ka Forest ki la ban jur ia ka jingdonkam ban pynsngewthuh ia ki paidbah ha kum kine ki jingjia. “Ki hati ki ju ïaid lyngba ki lynti khlaw hapoh bad sawdong ka Deomali. Lada don mano mano ba tih ïa ki thliew hajan kine ki jaka—na ka bynta ban shna ïing ne kiwei kiwei ki jingthmu—ki dei ban pynthikna ba ïa ki thliew yn ker hadien kata,” la maham uwei u heh sorkar. “Bun ki jingjia aksiden kiba ktah ïa ki hati bad ki khun masi ki mih namar ka jingbym shimkhia.”
Ka Deomali Forest Division ka la kyntu ia ki nongshong shnong ba ki dei ban pyntip mardor ia kino kino ki jingjia ba sngewsih ha kaba ia dei bad ki mrad khlaw, da kaba ban jur ba ka jingiarap kloi ka lah ban iada na ka jingmynsaw bad ka jingduh jingim hapdeng ki mrad khlaw.
