Nongpoh, Nailur 15: Ki Nongshongshnong ka thain Umden, Ri-Bhoi, kila iamih paidbah hynne ka sngi Thohdieng ban iashim bynta ha ka ‘Signature Campaign’ bala pynlong da ka Nongpoh Constituency Political Committee (NCPC), ba dawa ia ka Sorkar ban ai noh da ka surok ba thymmai jong ka surok Nongpoh-Umden-Sonapur ba 59 Km, ym ban shu maramot ia ka surok rim.
Kane ka jingmih paidbah kala wan jia namar ka jingjot rathai jong kane ka surok mynta la bun byn snem, kaba la buh ha ka jingkordit jingsohsat ia ki paidbah ka thain kiba hap pyndonkam ia kane ka surok manla ka sngi.
Ia kane ka ‘Signature Campaign’ la pynlong ha Iew Umden ha kaba ki paidbah na kylleng ki shnong jong ka thain, kila iashimbynta ha ka jingiasoi ban phah sha ka Sorkar Jylla.
Ha kane ka rynsan, baroh ki riew rangbah kiba ai jingkren, kila pynpaw ia kajuh ka jingsngewkhia halor ka jingiehbein ka tnad PWD (Roads) ia kane ka surok kaba la jot la pei la bun tylli ki snem.
“Ngi wan ban iashimbynta ha kane ka ‘Signature Campaign” ban ai ka jingkyrshan ïa ka kynhun NCPC kaba la mih shakhmat ban kren ïaka jingeh ki paidbah jong kine ki thaiñ halor kane ka surok” kila pynpaw.
Kine ki Nongkren kila dawa ia ka Sorkar Jylla ba ka dei ban shimkhia noh marmar halor ka jingpyntrei thymmai ia kane ka surok lem kumta ki paidbah kin mih ban pynlong da ki jingiakhih ba kynthup ia ka jingiaid rally bad jingiashong kyllain mungor.
Ha kajuh ka por, kila kyntu ia u MLA ka Nongpoh ba u dei ban pynkynmaw ia ka Sorkar halor ka jingeh bad jingkordit jong ki paidbah ka thain Umden da kaba kren biang ia kane ka kam ha ka Dorbar Synrai jong ka Iingdorbar Thaw Ain, kaba la sdang hynne ka sngi.
Ka NCPC ka pyntip ba ia kane ka jingiasoi paidbah yn sa bsut lang ha ka dorkhas ka ban sa leit buh ha ka miej treikam jong u Symbud Myntri Rangbah ka Jylla ba khmih ia ka Tnad PWD (Roads).
Pule lang ia kane: Kwah ka HANM ban pyrshah ki MP ka Jylla ha Parliament ban pynkylla iaka ‘India’ sha ka ‘Bharat’
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
