Shillong, Rymphang 15: Ka Directorate of Sports and Youth Affairs ka Sorkar Meghalaya kala pynlong ka jingiakop mareh kaba 6.5 km hapoh ka nongbah kum shi bynta ban ai mynsiem iaki samla kiba pynkhreh ia ka Khelo India University Games 2024.
Kane ka jingiakop mareh kala sdang na NEHU campus ban iaid lyngba ka Mawkynroh, Sanker Road bad pynkut biang ha NEHU ha kaba kane ka jingiakop kala khring iaki nong mareh bad kito kiba kit khia iaka koit ka khiah.
U Colonel Omkar Singh (Retd.), Registrar ka NEHU ula kaweh lama ia kane ka jingiakop mareh haka jingdong lang u Bah John F Kharshiing, Working President ka Meghalaya State Olympic Association lem bad kiwei kiwei de.
U Dabit Dkhar ula wan nyngkong haka Open Category ki shynrang, katba ka Marqueenless Ramseij kala jop haka Open Category ki kynthei.
Haka Open Category kiba la 50 snem, u Bah Badon Singh Tham ula jop haka liang ki shynrang bad ka kong Ibameri Shullai haka liang kynthei.
U Colonel Omkar Singh (Retd.), Registrar ka NEHU ula pyntip halor ki jingmyntoi ban kyntiew iaka kam mareh bad ula iaroh iaka Sorkar kaba la shim khia ban iarap kyntiew iaki samla bad ki nongialehkai naka bynta ban iakhun haki jingiakhun bapher bapher khnang ba kin lah wanrah nam iaka Ri.
