Shillong, Iaiong 2: U Kevin Lyngdoh Sangriang ula ioh ban khur haduh ar tylli ki Takma Ksiar ha ka 21st National Mountain Bike Championship 2025 kaba la long ha Morni Hills, Haryana ha ka 28-31 tarik u Lber 2025.
Une u khynnah uba don 15 snem ka rta na Mawkyrwat, South West Khasi Hills ula ioh ia ka Takma Ksiar ha ka jingiakob niah saikil kaba la tip kum ka Cross Country Time Trial bad ka Cross Country Olympic (XCO).
ia katei ka jingiakob niah saikil la pynlong da ka Haryana Cycling Association kaba don hapoh ka lama jongka Cycling Federation of India.
Na ka bynta katei ka jingiakob, u Kevin ula pyndonkam da ka saikil kaba T. 1 Lak ia kaba bei tyngka da u Myntri Rangbah ka jylla u Conrad K. Sangma.
“Nga kwah ban ai khublei ia u Myntri Rangbah, Conrad Sangma uba la iarap ia nga da kane ka Cycle bad ka dei namar ka jingiarap jong u ba nga la ioh ban rah ia kine ki takma ksiar” ong u Kevin.
