Shillong Nohprah 16: Ka Shillong City District Unit jong ka BJP ka la pynbna ban pynlong iaka Bike Rally haka 17 tarik mynta u bnai kum shi bynta ban pynsaphriang bad ban pynsngewthuh ia ki paidbah halor ki kam bad ki projek kiba ka sorkar pdeng hapoh ka jingialam u Myntri Rangbah duh ka ri u Narendra Modi ula leh naka bynta ki paidbah ka ri.
Ka seng BJP kala pyntip ba katei ka Bike Rally kan sdang haka por 9 baje mynstep bad kan sdang na madan Fire Brigade, Iewrynghep bad yn pynkut haka ophis treikam jongka BJP hadien ba kila dep ban leit iaid ha kylleng ki jaka kiba don haka nongbah Shillong.
Ia katei ka rally yn sdang da ka jingkaweh lama da u President ka BJP Meghalaya u Bah Ernest Mawrie ha kaba yn iadonlang ki MLA bad kiwei kiwei ki nongkitkam ka BJP.
Ka jingthmu ban pynlong ia katei ka bike rally ka long haka nongrim ban pynsngewthuh ia ki paidbah ia ki kam pynroi kiba la urlong haka jylla Meghalaya namar ka jingtheh pisa ka sorkar pdeng ia ki skhim bapher bad ia kane ka rally yn tip ruh kum ka “Rally for Development”.
Kadei ruh kum shi bynta ban pdiang sngewbha iaa u Narendra Modi u ban wan poi haka nongbah Shillong haka 18 tarik u Nohprah ha kaba yn leit ban ai jingkren haka jingialang kaban long ha madan Polo.
