Da 8.40 lak kiba pep skul shiteng por ha Meghalaya; plie lad ka MBoSE ia ki kyrtong shimet ban iakhun eksam SSLC

Shillong, Jymmang 20: Ban shimkhia ia ka jingjur ka jingieh noh ia ka jingpule, ka Meghalaya Board of School Education (MBOSE) kala khot ia ka aplikeshon na ki samla pule shimet ne Private Candidate jongka Secondary School Leaving Certificate (SSLC) Examination.

Katkum ki jingtip kiba la pyllait dang shen da ka UDISE, ka jylla kala buh antad ba ki don kumba 8.40 lak ngut kiba la iehnoh ia ka jingpule ka jongki” la ong ka Board, “Da kaba pynpaw ia ka jingdonkam kyrkieh ban pyniar ia ka jingpule bad ka rukom pynlong ia ki eksamin”.

“Ha kaba iadei bad kane ka bynta, ka kyndon na ka bynta ki Private Candidate ka long ka sienjam kaba kongsan ban shim ban pynthikna ba ka pule puthi kan long kaba iohlad da baroh” la pynpaw ka MBOSE ha ka jingpynbna paitbah.

“Kane ka sienjam ka thmu ban pynkhlain ia ka jingai ia ka pule puthi kaba salonsar da kaba ai ia ka lad ka baar ia ki nongpule, kiba mad ia ki jingeh shimet, ne na ki daw jong ka imlang sahlang bad ka ioh ka kot” la ong ka Board.

“Kan plie lad ia ki samla pule ba kin ioh ban rung biang sha ka thup jong ka pule puthi bad ban pyndep ia ka jingpule ka jongki ha ka kyrdan Secondary”.

Da kaba weng ia ka jingeh, ka MBOSE kala pynthikna ba kam don kano kano ka jingbuh kyndon ia ka rta. “Ka board kala pynshai shuh shuh ba kan ym don kano kano ka jingbuh kyndon ia ka rta ia ki Private Candidate kiban ialeh ia ka eksamin SSLC, kumta kan plie lad ia ki nongpule ha ki rta bapher bapher kiba don ia ka jingangnud ban pyndep ia ka jingpule ka jongki”.

Ia ki aplikeshon lah ban aiti ha ki Centre kiba don ha ki shnong ban pynsuk ia ka kam ka jam. “Ki samla kiba don jingthmu ki lah ban aplai na ki Centre kiba don hajan eh, ban pynlong ia kane ka jingthep ia ka aplikeshon kaba plie ia baroh bad kaba suk”.

Ka Board kala kyntu ia baroh kiba aplai ba kidei ban khmih bniah bha ia ki jingtip. “Ki samla pule kiba lah ban thep, la bthah ba kidei ban pule bniah bha ia ka jingpynbna paitbah, kynthup ia ka bynta ne kyrdan kaba lah ban thep, ki kot ki sla kiba donkam, ka jingsiew bad ka rukom aiti ia ki kot ki sla bad ban pyndep ia ka aplikeshon ka jongki hapoh jong ka por kaba la buh”.

“Ka MBOSE ka iengskhem ha ka jingkitkhlieh ban pynthikna ba kadei ban long ryntih ha ka jingplie lad ia baroh ha ka pule puthi bad ka iengskhem ba ka jingai ia ka sertiphiket ka long kaba plie bad kaba salonsar ia baroh ki nongpule” kala bynrap.

Ka Board kala kyntu ia kiba donbynta lang ha ka kam, ki skul bad ki dkhot jong ki shnong ki thaw ba kin pynsaphriang sha kylleng ia kane ka jingpynbna paitbah khnang ba bun bha kin ioh ia ki jingtip bad ba kin ioh ban iashimbynta.