Tura, Jymmang 28 : Haduh 205 tylli ki Iing na ki 88 tylli ki Shnong ka West Garo Hills, kila shah pynjulor ha ka Cyclone Remal, pyni ia jingkhein bala ioh na ka Disaster Management Authority.
Kiba bun na ki jingpynjulor ki dei kiba jia ha ka miet shiteng synnia jong ka sngi Nyngkong bad ka step synnia jong ka sngi Ba-ar ha kaba ka eriong ka dang jur bha bad iaid lynti lyngba ka Ri-lum Garo.
Nalor u slap, ka dei ka jingjur ka lyer kaba la pynjulor eh bad khamtam ia ki post eletrik bad ki dieng kiba la shah jynrat naduh tynrai ha kiba bun ki jaka kynthup ha sor Tura.
Kat kum ka jingpyntipu Deputy Commissioner ka West Garo Hills Jagdish Chelano, haduh 931 ngut ki briew na ki 88 tylli ki shnong ka District kila mad ia ka jingshah ktah ha kane ka cyclone.
“Ka jingpynjulor kala jia ia 205 tylli ki iing, 6 tylli ki skul, kawei ka Anganwadi Centre bad kawei ka Multi Facility Centre ha ka District” ong u Deputy Commissioner.
Hynrei ula pyntip ba kam shym la don satia kano kano ka jingjia ba sngewsih ne jingiap briew hapoh ka District.
“Haduh mynta ym pat ioh jingtip ia ka jingiap ki briew” ula ong haba pyntip ba don tang kawei ka longkmie ha Civil Hospital kaba mynsaw bad kane ka dei kaba wanrah na Chokpot.
Kane ka Longkmie ba 55 snem ka rta na Rajaronggat Rongpakgre, Chokpot ba kyrteng ka Merry Ch Marak, kala mynsaw na ka jinghap u nar post elektrik ha ka hynnin ka sngi Nyngkong.
