Shillong, Jymmang 27 : Ki Deputy Commissioner jong ki District bapher bapher ka Jylla, kila pynmih ia ka hukum ba phah khang khyrdep ia ki skul bad college lashai ka 28 tarik Jymmang namar ka jingjur u slap bad ka lyer na ka daw ka jingsyllad ka Cyclone Remal ha Bay of Bengal.
Ki District kiba la pynmih hukum ban phah khang khyrdep ia ki jaka pule ki kynthup ia ka East Khasi Hills, ka West Jaintia Hills, Ri-Bhoi, East Garo Hills, West Garo Hills bad South West Garo Hills.
U Deputy Commissioner ka East Khasi Hills SC Sadhu ula ong ba namar ka Cycolne Remal, ka Indian Meteorological Department (IMD) kala pynmih ia ka jingmaham ba kan don ka jingther u lapbah bad ka eriong hapoh ka District naduh mynta ka sngi 27 tarik bad lashai ka 28 tarik Jymmang.
Ula ong ba khnang ban kiar na kino kino ki jingjia ki bym sngewtynnad, la bthah ba baroh ki skul hapoh ka District ki dei ban khang khyrdep lashai ka sngi.
Kumjuh ruh u Deputy Commissioner ka West Jaintia Hills Bah BS Sohliya, ula ong “Namar ka jingsniew jong ka suinbneng na ka daw ka Cyclone Remal, kumba la batai lypa da ka IMC, ba kan wanrah ia u slap uba jur bad ka lyer kaba khlain ha ka District jong ngi, ka long kaba kongsan ban buh hakhmat ia ka jingshngain bad ka bha ka miat ki khynnah skul, ki nonghikai bad ki nongtrei jong ki skul”.
Ula ong ba baroh ki skul (skul Sorkar bad skul Shimet) kiba don hapoh ka District kin khang khyrdep ha ka 28 tarik Jymmang kum ka lad jingiada ia ki jingma balah ban wanrah da ka Cyclone Remal.
U Deputy Commissioner ka Ri-Bhoi, East Garo Hills, West Garo Hills bad South West Garo Hills ruh kila pynbna ban khang khyrdep ia ki skul hapoh ki District jong ki namar ka jingther u lapbah bad ka eriong bala wanrah da ka cyclone Remal, ia kaba la khmih lynti ba kan nang jur ha kine ki 24 kynta ban wan.
