Shillong, Nohprah 03: Ka kynhun U-19 jong ka Meghalaya kala pynliem iaka Sikkim da 2 Wiket ha ka jingiakhun ia ka Cricket jongka Cooch Behar Trophy kaba la long ha Rangpo, Sikkim.
Kane ka jingiakhun kala sdang haka sngi Thohdieng, ka Sikkim, kala leit ban tied nyngkong bad kala kamai 183 run bad hap lut ki wiket bad kila tam da 38 run iaka Meghalaya kaba la kamai tang 145 run bad hap lut ki wiket.
Ka Sikkim kala tied biang bad kamai 139 bad ka Meghalaya kala hap ban kamai haduh 178 run ban jop ia kaj ingiakhun bad haba ka Meghalaya kala leit ban tied kala lah ban kamai bad pyndep ia ka jingiakhun da kaba sah sa 2 wiket.
Ha ka jingiakhun kaba nyngkong u nongkawang bol ka Meghalaya u Shavian Blah ula ioh 4 wiket bad ka Sikkim ha ka por ba ka kamai 82 run kala hap haduh 8 wiket hynrei u Aadnan uba la tied hadien ula kamai 80 run.
Ki nongkawang bol ka Meghalaya kiba kynthup ia u Kishlay Vishlux bad u Charm Marbaniang kila ioh khur mar 2 wiket, katba u Banialam Mylliemngap bad u Angkit Tamang kila ioh mar shi wiket.
Ka Meghalaya kaba la leit ban tied kala kamai 145 run bad u Pushkar Raj Singh ula tied bha marwei bad kamai 46 run, katba u nongkawang bol ka Sikkim u Siddharth ula ioh khur 5 wiket.
Ka Sikkim kala leit banbiang biang ha ka wat ka baar bad ha kaba u Siddharth marwei hi ula kamai 40 run katba kiwei kiwei kim shym la lah ban tied bha bad ka Sikkim kala hap 8 wiket bad kamai tang 76 run hynrei ki nongtied kiba hadien kila lah ban pynpoi 139 run.
U Angkit ula shim 3 wiket, u Avinash Rai, Kishlay bad u Charm kila shim mar 2 wiket.
Ka Meghalaya ka hap ban beh ban kamai 178 ban jop, kumta ki nongtied kiba kynthup ia u Angkit ula kamai 56 run, u Manthan Dey ula kamai 38 run bad u Pushkar ula kamai 35 run, hynrei hadien kane ka Meghalaya kala kamai 164 run bad hap 4 wiket bad haduhba kanda kamai 170 run kala hap 8 wiket.
Da ka jingtied bha u Avinash 27 bad u Charm 6 run khlem out kila lah ban pynjop ia ka Meghalaya.
Ka Meghalaya mynta kan leit sha Anand, Gujarat, ban iakhun pyrshah ia ka Arunachal Pradesh ha ka 8 tarik u Nohprah.
