Shillong, Nohprah 02: Ka long shisha ka sngi kaba bha ia ka kynhun ialehkai cricket ka Meghalaya, ha kaba ka la lah ba kan bteng ban jam shakhmat bad tehlakam ia ka kynhun ialehkai jong ka Arunachal Pradesh, ha ka sngi ba ar jong ka lympung ialehkai the U-19 men’s Cooch Behar Trophy 2025-26, ba la long ha madan jong ka MCA, ha Polo.
Tad haduh ba la kut jong ka sngi, ka Meghalaya ha ka pali wan tied kaba ar jong ka, ka la lah ba kan kamai 298 ron bad ba ka la hap noh 5 wiket, ha kaba u Angkit Tamang, u la jan artad ban poi sha ka thong ban lah kamai ia ka spah ron (century).
Ha kaba kut noh artad ka sngi, ka Meghalaya ka la don ha ka nongrim kaba skhem hadien ba ka la lah ba kan kamai 367 ron, kaba la wan hadien ba ka la lah ba kan pynhap lut ia ki wiket ba sah ka Aurunachal, hadien kajinglah kamai tang 136 ron.
Marsien sdang ka sngi kaba ar, ki nong kawang bol ka Meghalaya ki la lah ban bol bha bad ban pynhap syndet ar tylli ki wiket ka Arunachal, bad ia kine ki wiket la khur ia ki da u Gaurav Narleng bad Apandanka Marak, hynrei shwa ban pyndem hi toin ialade, u Armaan Jain (25 not out) u la ieng ban iakhun tyngeh kaba pynlong ia ka Arunachal ba kan lah ban kamai 136 ron.
Ki rang kawang bol ba la kham paw ka Meghalaya ki kynthup ia u Gaurav Narleng 3/28, Apandanka 2/26, Benedict Jones Makdoh 1/15 bad u Angkit 1/16.
Haba wan ban sdang ia la ka pali tied kaba ar, u Sameer Choudhury u la hap ban wanphai noh sha ka jaka ba shong ki player hadien ba u la mynsaw.
Hynrei kane kam shim la don jingktah ia ka kynhun, namar ba wan mih madan ka jingkamai ron paralok kaba 83 ron hapdeng u Dipayan Nandi bad u Gaurav Narleng ba la wan tang na ki 86 tylli ki bol, ha kaba u Dipayan u la bteng ban jam shakhmat ban lah ban kamai 94 ron na ki 80 tylli ki bol bad u la shat bha la ki jong ki khmat ban jam sha ka spah ron, hynrei u la out noh.
Hadien kane, u Jyoti Thakuria bad Angkit Tamang ki la shim ha ki ia ka jingkit khlieh ban bteng ban kamai ia ki ron kiba ka kynhun ka donkam bad kamai haduh 131 ron hadpeng jong ki, hynrei shwa ba ka sngi kan khreh ban dum noh, u Thakuria u la run out hadien ba u la kamai 56 ron, hynrei u Angkit u dang iai neh hapdeng ka madan iakhun hadien ba u la lah ban kamai 87 ron ba la wan na ki 120 tylli ki bol bad kyrshan pat ia u na sha shilliang da u Rudra Singh Rathor uba la lah ban kamai 12 ron.
Haba khmih ia kane ka jinglah ban ialehkai bha, la khmih lynti ba ka kynhun jong ka Meghalaya kan lah ba kan jam shakhmat ban kamai wat shaduh ka saw spah ron, kaban kylla long ka thong bah thongsan ia ka Arunachal ba kan lah ban leit phai na kane ka jingiakhun bad ka jingjop.
