Shillong, Naiwieng 28: Ka kynhun ialehkai Cricket ka jylla Meghalaya kala kamai 178 run bad hap lut ki nongtied haka First Innings jong ka U-19 Men’s Cooch Behar Trophy 2024-25 Elite Group A pyrshah ia ka Baroda kaba la long ha MCA Ground, Polo, hynne ka sngi Palei.
Ka Meghalaya kala leit ban tied nyngkong bad kala kamai 178 run bad la sakhi ba ki nongtied kim shym la lah ban ialehkai bha hynrei haba ki nongkawang bol kila mih ha madan ban tied kila lah ban ialehkai bha, ha kaba u Shavian Blah ula kamai 52 run na ki 57 bol bad u Angkit Tamang ula kamai 33 run bad ym shim la Out bad u Ashish Kumar Lohar uba la mih ban tied khatduh ula kamai 25 run na ki 35 bol.
Hashwa katei ki nongtied kiba la mih shakhmat jong ka Meghalaya kiba kynthup ia u Shubham Rasaily bad Manthan Dey ula lah ban neh slem hynrei kim shym la lah pat ban kamai run bad bun ki nongtied kila hap dang kloi.
U Nongkawang bol ka Baroda Pavan Patel ula ioh khur 4 wiket bad ai 58 run.
Ka Baroda, kaba la jop baroh 3 sien ha ki jingiakhun, kala leit ban tied bad kala kamai 55 run bad ym shim la don ba Out bad mynta ka dang sah ban beh iaka sa 123 run.
U Nitya J Pandya ula kamai 40 run katba u Smit Rathva ula kamai 13 run bad kine baroh ar ngut ki nongtied kim pat Out satia haduh ba kut ka jingialehkai hynne ka sngi.
