Shillong, Naiwieng 29 : U Myntri Rangbah ka Jylla Conrad K Sangma hynne ka sngi ba-ar ula pyntip ba ka Sorkar Jylla kala peitthuh bha ia ka jinglong jingman ka suk ka sain hapoh ka Jylla.
“Ngi la peitthuh bha ia ka jinglong jingman ka suk ka sain bad baroh ki Pulit bad ki bor Sorkar kila peit thuh bha ia ka jinglong jingman” ong u Conrad haba iakren bad ki nongthoh khubor.
Haba pynpaw ba ia ka jinglong jingman la lah ban tehlakam, u Myntri Rangbah ula ong “Hynrei kane kam mut pat ba ngin khein sting noh bad ngin pynthikna ba ka jingpeitthuh kan iai bteng beit”.
Haba kyntu ia baroh ban long jai jai bad pynneh ia ka jingsuk ha Jylla, u Conrad ula ong “Nga kyrpad ruh ia ki Nongshongshnong, ki riew tynmen, ki kynhun bapher bapher, ki Sengbhalang ka Nongbah Shillong bad ka Jylla ba kane ka dei ka por ba kongsan bha ia ngi bad ki kam thombor kim dei satia ka lynti ban jam shakhmat”.
“Ngim ym ioh eiei da kaba jrong kti namar ki briew ki ban mad jingeh kin dei ki briew jong ngi hi bad kam don nongrim ia ngi ban leh kumta ne pynjynjar iala ki jong ki briew. Namar kata, hooid ka dei ka por kaba eh hynrei ka dei ruh ka por ban iatreilang bad ban jam shakhmat” ula bynrap.
Haba kylli la ka Sorkar MDA ka jem palat ban tehlakam ia ka jingshongsuk shongsain, u Myntri Rangbah ula ong “Nga kwah ban ong kumne, baka long kaba suk ban shu ai hukum ban siat ia ki briew bad ban pyndonkam ia ka bor. Ngan iathuh ha phi ba ka long kaba suk palat hynrei ka eh pat ban sngewthuh bad don ka por ban sngap, ban pynbeit katba ki jinghylla ki dang mih na kylleng”.
Ula bteng “Ki briew ki kwah ban peit ia kane kat kaba ki mon, ngam don jingsngew ia kata. Hynrei ia ngi hi, nga la ju bat beit ia kaei kaba nga iohi bad pyrkhat bad nga nga hi ka jingsuk ha ka Jylla, ka jingshngain ki Nongshongshnong, ka jingroi ka Jylla ka dei kaba kongsan tam.
