Shillong, Naiwieng 29 : Ka jingiakren pynbeit pud jong ka wat ba-ar hapdeng ka Meghalaya-Assam ban pynkut noh ia ka jingiakajia ha ki hynriew tylli ki jaka ba dang lah, ka kham jyrwit jyrwat bad ka lah ban nang shimpor hadien ka jingjia ba 22 tarik Naiwieng ha Mukroh, West Jaintia Hills District.
Ia kane la pynpaw da u Myntri Rangbah ka Jylla Conrad K Sangma haba iakren bad ki nongthoh khubor.
U Myntri Rangbah ula ong ba ha ka jingshisha u don ka jingkhmih lynti ba ka wat kaba ar jong ka jingiakren pud ka lah ban long hapoh une u bnai hynrei mynta bala jia kine kiei kiei, ka jinglong jingman kala kham pher.
“Ngi lah ban nym pat shong jingiakren ia mynta watla ngi sngew ba kane ka dei ka lynti ba ngin jam shakhmat” ula ong.
Haba pynpaw ba kane ka sorkar jong u kala kut jingmut shisha ban pynbeit noh ia ki jingiakajia pud bad ka Assam, u Conrad ula ong “Ngi kwah ban trei sted kat kaba lah ban pynbeit noh namar ka dei tang kane ka lynti ban pynthikna ba kum kine ki jingjia kin ym jia shuh hadien habud hynrei namar kane ka jingjia ba sngewsih, kiei kiei baroh kila kylla lut”.
Ula bynrap “Namar kata, ngi hap ban pynslem, ngi hap ban iakren bad ka Sorkar Assam bad ka Sorkar India bad ngin peit lano kan biang ka por ba ngin shong iakren bad ki”.
Ha ka 22 tarik Naiwieng, hynriew ngut ki briew kynthup ia 5 ngut ki paid Khasi bad uwei u Forest Guard ka Assam, kila kyllon iap ha ka jingther kuli jong ki Pulit Assam ha shnong Mukroh, West Jaintia Hills District.
