Shillong, Jymmang 03 : U Myntri Rangbah ka Jylla Conrad K Sangma ula niew ia kane ka jingthut ka suk ka sain kaba mih na ki jingjia kawang petrol bomb ka dei ka kam ‘pynphai kylliang’ ia kaei ka kam kaba jia bad kular ba ka Sorkar kala shim ia ki sienjam ban tehlakam noh ia ki.
Haba iakren bad ki nongthoh khubor, u Conrad ula ong ba ki don katto katne ki jingjia kiba la jia bad ka Sorkar kala ieng skhem ha ka nongrim ban pynthikna ba kiei ki sienjam ba donkam ban shim ha kaban kem ia ki briew kiba donkti ha kine ki kam (kawang petrol bomb), yn pynshong nongrim halor ki sakhi satar kiba khlain.
“bad namar kata ngi khlem khmih lynti ba kan don ka jingpynphai kylla. Kumta ngi hap ban long shai ba kane ka dei ka jingpynphai kylla ia kaei kaba la jia bad kumta, ngim lyngngoh satia ia kaei kaba jia” ula bynrap.
Haduh phra tylli ki jingjia kawang petrol bomb kila jia ha Jylla tang ha kane ka shibnai bala leit noh. Kine ki kynthup ia ka jinghiar thma ia lai tylli ki Police Station-Sadar Polcie Station, Rynjah Police Station bad Mawlai Police Station, ka Ophis ka MGCC ha Rilbong, ka Jowai Police Reserve bad ka kali ka Tnad Water Resource. Ki Pulit kinn dang ban kem ia ki briew ba donkti ha lyndet kine ki jingjia.
“Hooid, kala jia man ka por hynrei ngi tip bha bad ngi la trei khlem shongthait ban pynthika ba kum kine ki jingjia kim dei ban jia bad ki Pulit kila shim ia ki sienjam ba donkam ban shim hynrei ngam kwah ban batai bniah ia ki” ong u Conrad haba kular ia kipaidbah ka Jylla ba ka Sorkar kala shim ia ka sienjam ban tehlakam ia ka jinglong jingman.
Haba kylli la kine ki jingkawang petrol bomb ki don jingiadei bad ka jingkem ia ki dkhot ka KSU halor ka jingshah pyniap ki nongbylla bar jylla ha Mawlai Mawroh bad Ichamati, u CM ula ong “ Kiei kiba jia kila jia hadien kaa hynrei kumba nga ong ban shu rai kut bad ong ba ki dei kine ki briew khlem da pynshisha bad ki sakhi satar ka long kaba bakla shibun namar ka Sorkar kam lah ban iaid da ka lynti ba shu antad lane ki Pulit kin leh eiei halor ki jingantad”.
U Conrad ula ong ba ka Sorkar bad ki Pulit kin nym map satia iano iano ruh kiba leh ia ki kam bymman.
