Shillong, Iaiong 17 : U National President ka NPP bad Myntri Rangbah ka Jylla Conrad K Sangma hynne ka sngi Nyngkong ula ong ba ka jingiakren bad ki arngut ki MLA ka People’s Democratic Alliance (PDF) ban iasoh noh sha ka NPP ka dang iaid shakhmat.
“Ka jingiakren kan sa long hynrei kumba nga ong, kam pat don satia kano kano ka rai ne kano kano ruh. Namar kata, ngin ia ap bad peit ynda la poi ka por” ong u Conrad haba iakren bad ki nongthoh khubor.
Kumba long mynta, ka PDF ka don arngut ki MLA kata u Bah Banteidor Lyngdoh ba mihkhmat ia ka Mawkynrew constituency bad u Bah Gavin M Mylliem ba mihkhmat ia ka Sohra constituency.
Lada kane ka jingwan iasoh ka urlong, ka jingdon paid/MLA jong ka NPP kan kiew sha ka 28 ngut ha ka Iingdorbar ba 59 ngut ki dkhot.
Dang shen, u Bah Banteidor uba dei u Working President ka PDF ula ong “Ka jingiakren kala iaid ban iasoh noh sha ka NPP. Ngin sa shim ia ka rai ynda la dei ka por”.
Haba kylli, u Bah Banteidor ula ong ba um pat lah satia ban ong eiei palat ia kane namar ba um lah tang marwei ban shim ia ka rai.
