Shillong, Risaw 15: Watla u Kevin Christopher ula ioh ia ka Half Century ne kamai palat 50 run katba u Abhishek Kumar ula ioh khur 4 wiket hynrei ka Meghalaya kala mad ia ka jingrem ha ka Punjab da ka Innings bad 129 Run ha ka jingiakhun kaba nyngkong jong ka U-23 Men’s Col CK Nayudu Trophy 2024-25.
Kane ka jingiakhun kala sdang ha ka sngi u Blei, ha kaba ka Meghalaya kala jied ban kawang bol nyngkong.
U Abhishek uba la leit ban kawang bol nyngkong bad ula shim 4 wiket bad ai 71 run bad ka Punjab kala hap lut ki nongtied da kaba kamai 313 run. Baroh 5 ngut ki nongkawang bol ka Meghalaya kila ioh wiket, ha kaba u Manish Sharma ula ioh 3 wiket, u PM Santhosh, u Purav Agarwal bad u Navin Kr Ray kila ioh mar 1 wiket.
Ka Meghalaya kam shym la lah ban ialehkai ha ka por ba ka leit tied bad kala kamai tang 77 run bad haph lut ki wiket bad tang u Navin marwei uba la ioh ban kamai 19 run.
Hadien kane ka Meghalaya kala ioh ia ka lad ban leit biang ha ka sien ka baar, ha kaba u Kevin ula kamai 52 run na ki 69 bol, hynrei ka jylla Meghalaya kala hap lut ki nongtied bad kamai tang 107 run bad pynlong ia ka Punjab ban jop suk.
Ka Meghalaya kan iakhun pyrshah ia ka Andhra Pradesh naduh ka 20 tarik u Risaw.
