Shillong, Nailar 31: U Myntri Rangbah ka Jylla Conrad Kongkal Sangma ula pyntip ba ka sorkar jylla kam pat shim rai satia halor ka jingdawa jong ki nongshet bam Mid Day Meal ban pynkiew ia ka bainong ba manla u bnai.
Haba iakren bad ki nongthoh khubor, u Conrad ula kular ba ka sorkar kan sa iakren shen ia kane ka kam jong ki.
U Conrad ula pynpaw ia kane haba jubab halor ka jingiakhih jong ki nongshet bam Mid Day Meal ha ka Nongbah Shillong.
Ki Nongshet bam Mid Day Meal kiba don ha ka lama All Meghalaya Mid Day Meal Workers Union, kila dawa ia ka sorkar ban pynkiew noh mardor ia ka bainong jong ki na ka T. 1000 sha ka T. 3000 shibnai.
U Nongaibuit ka Union Bah KL Pariat ula pyntip ba kane ka jingdawa ka dei kaba la sahteng naduh u snem 2019 bad kam pat ju don satia ka jingkhot iakren na u Myntri Rangbah kat haduh kine ki sngi ba mynta.
“Ngi la dep phah haduh hynriew sien ki shithi pynkynmaw sha u Myntri Rangbah tad haduh u bnai Nailar mynta u snem, ban pynkiew noh ia ka bainong” ula ong.
Ka Union kala dawa ruh ban ai ia ka tyndong lyer shet jingshet ban pynkhreh ia ka bam Mid Day Meal namar bym pat don satia ka skul ha Meghalaya kaba la pyndonkam ia ka LPG.
