Shillong, Lber 21: U Myntri Rangbah ka jylla Conrad K Sangma hynne ka sngi ba-ar ula ong ba ka jingjied biang ki paidbah ka jylla iaka sorkar synrop Meghalaya Democratic Alliance (MDA) ka pyni ba ki paidbah kila jied ban don bynta haka ‘Agni Pariksha 2023’.
“Ki paidbah ka jylla kila jied iaki party ba don hapoh ka MDA bad kane pyni ba ki paidbah kila jied iaka ‘Agni Pariksha’ naka bynta ban iarap ialade naka jingeh kiba bun” la ong u Conrad.
Haba kyntait ban kren halor ka jingkren u Myntri Rangbahduh ka ri India Narendra Modi, naka liang u Conrad ula ong “Ngi la dep kren ia kiei kiba donkam ban kren haka por ialap elekshon, wat ki paralok kiba don lang hapoh ka sorkar MDA ruh kila kren pyrshah ia ngi hynrei ki paidbah kila jied bad kila kren bad mynta ki kwah ba ka sorkar kan long kaba trei naka bynta baroh”.
Haba wanrah ka jingiatai ba lyngkot, u MLA ka VPP na North Shillong bah Adelbert Nongrum ula ong, hato u Myntri Rangbahduh bad u Myntri ka tnat kam pohïng ka ri India ki khlem pyrkhat ha shuwa ban kynthoh ba ka Meghalaya kadei ka jylla ba bamsap tam hapoh ka ri baroh kawei.
“Hato kum ki nongialam ba hakhmat eh, kin kren ne kynthoh khlem da don ka jingtip ba kham bniah haba iadei bad jingpyndonkam bakla iaka song pisa ba ai ka sorkar pdeng sha man ki sorkar jylla bad lada lkane ka jingkynnoh kadei kaba bakla, kadei ka kamram jong ka sorkar jylla ban jubab tyngeh shaka sorkar pdeng, halor ka jingkynnoh”.
Halor kane, u Myntri Rangbah ka jylla Conrad K Sangma, ula pyntip hapoh ka ïingdorbar halor ka jinglah ka sorkar MDA ban pyntrei iaki skhim sorkar pdeng khamtam halor ka Jal Jeevan Mission (JJM), ka PMGSY bad kiwei kiwei de.
“Kine baroh kidei ki sakhi sabut ba ka Meghalaya kala trei bha namar kadei hi ka sorkar pdeng kaba la ai syrnod” ula ong.
“Kadei ka jingshisha ba hapoh ka sorkar MDA 2.0, ka BJP ruh ka don lang bad wat haka por bamsmai bad shimti iaka sorkar thymmai, u Myntri Rangbahduh bad u Myntri ka tnat kam pohïng kila wan sakhi lang bad kane ka kdew shai ba ka sorkar pdeng ka iohi iaka jinglah ka sorkar MDA ban trei bha” ula bynrap.
Haba pynkynmaw ba ka ‘agni pariksha 2023’ kala kut, u Conrad ula ong kadei ka kamram jong baroh ki nongialam ban trei naka bynta ka jingbha ki paidbah bad ka jylla baroh kawei ban pynlong iaka Meghalaya kum ka jylla ba hakhmat eh.
Haba shim bynta haka jingiatai u Dr. Mukul ula kam ba ka bamsap ka lah ban pyndkhoh ïa ka jylla bad kan ktah ïa ki pateng kiban wan bad dei namar kane ym dei ban kheiñ sting ia ka jingshah kynnoh bamsap bad dei namar kane ka sorkar kadei ban shim da ka Resolution halor kane.
“Ngim dei ban ban kheiñ sting ia ka jingshah kynnoh bamsap bad dei namar kane ka sorkar kadei ban shim da ka Resolution halor kane bad dei ban kyntu iaka sorkar pdeng ban pyni ia ki dak bad ka sorkar India kadei ban leh ïa kaba donkam ban tohkit halor kita ki kam bamsap khnang ba ka jylla kan lait na ka jingshah pynrem kum ka jylla ba bamsap” la ong u Dr. Mukul.
