Shillong, Naitung 28 : U Myntri Rangbah ka Jylla Conrad K Sangma ha ka sngi Thohdieng, ula ong ba ka jingjia ha Mahadev Khola kam don jingiadei eiei ruh em bad ka kam iapher niam ne iapher jaidbynriew.
“Ka dei ka jingjia kam shimet bad kam don jingiadei bad ka kam iapher niam ne iapher Jaidbynriew hynrei ka jia ryngkhat ba ki ar kynhun ki dei na ki ar Jaidbynriew bad kumta, kam long kaba iadei ban shu pyniasnoh bad sa pyrshang ban pynman kam iapher Jaidbynriew ne iapher niam” ong u Conrad haba iakren bad ki nongthoh khubor.
Ki Pulit kila kem ia 3 ngut ki briew bad 2 ngut ki Khynnah halor ka jingdonkti ban thombor bad lute ia ka nongshong dukan ha Mahadev Khola ha ka 24 tarik Naitung.
U Conrad ula pyntip ba ki Pulit kila wad bniah shaphang kine ki briew ba shah kem bad lap ba kim don jingiadei satia bad kino kino ki kynhun sengbhalang. “Ka dei ka kam shimet kaba jia hapdeng ki ar kynhun bad kat kum ka ain ka kanun, kaei ka kam kaba dei ban leh yn sa leh” ula ong.
U Myntri Rangbah ula kyntu ruh ia baroh ba kim dei ban pynman ia kum kine ki jingjia kum ki kam iapher jaidbynriew bad ong “Kane kam long kaba dei nab aka lah ban lam sha ka jingbym shongsuk”.
La ka Sorkar kan leh eiei pyrshah ia ka jingpathai khubor thok da ki National media halor kane ka jingjia, u Conrad ula ong “Ngam pat poi shaduh uta u pud hynrei nga mut ba ngi khmih lynti ba ki lad pathai khubor kin don ia ka jingbahkhlieh ruh ba kin nym pyniakhleh kam jaidbynriew hynrei lada kila iaid palat ia u pud, ngin hap ban leh eiie pyrshah ia kine ki lad pathai khubor kiba pynmih ia kine ki khubor. Kumba nga ong, kine ki lad pathai khubor kin hap wad bniah, wad ia ka jingshisha bad sa pynmih ia kiei kiba ki shem hynrei nga ban jur ba kam don satia ka jingkajia iapher niam ne jaidbynriew halor kane ka jingjia”.
Ha kajuh ka por, u Myntri Rangbah ula ong ba ka jingjia ha Mahadev Khola kam don jingiadei eiei ruh em bad ka jinglong jingman ha Manipur.
Pule lang ia kane: Kurup ki Pulit ka EJH ia u ganja ba shongdor T. 21 lak, kem 3 ngut
