Shillong, Lber 20 : U Myntri Rangbah ka Jylla Conrad K Sangma hynne ka sngi nyngkong, ula ong ba ka Jylla Meghalaya ka dei kawei na ki katto katne ki Jylla kaba la ioh ia ka song pisa bynrap (Addl fund) ba T. 300 klur kum ka jingaitam (bonus) baka lah ban pyntreikam pura ia ka Capital Investment Fund (CIF).
Haba iakren bad ki nongthoh khubor, u Conrad ula ong ba ka Jylla kala pyntreikam ia ka song pisa ha ka rukom kaba dei ha ki project bapher bapher bad ki skhim bapher bapher. Ula ong baka Capital Investment Fund (CIF) ka dei kaba la ai sha baroh ki Jylla kum ka nuksa.
“Namar kata, ngi la kyrpad ia ka Sorkar India ban ai ia ka song bynrap kum ka jingaitam sha ngi namar ngi la lah ban pyndep bad pyntreikam pura ia ka CIF. Ta ka daw, ka Meghalaya ka dei kawei na ki katto katne ki Jylla kaba la ioh ia ka song bynrap. Hadien ba nga kyrpad ia ka Sorkar India, ngi la ioh biang sa 50% ka pisa bala ai sha ngi. Ngi la ioh T. 600 klur haba sdang bad ngi dei kawei na ki katto katne ki Jylla kiba la pyndep hapoh u 2022-2023 bad mynta ngi la ioh sa T. 300 klur” ula ong.
Haba kdew ia ka jingleit Delhi jong u ba dang shen, u Myntri Rangbah ula ong “Hadien ka elekshon bad dep bam smai kum u Myntri Rangbah ha ka sien kaba ar, nga sngew dei ba ngan hap leit iakynduh ia ki Myntri ka Sorkar Pdeng bad buh jingkyrpad ha ki ba kumba kila kyrshan ia ka Sorkar Meghalaya ha ki san snem bala lah, kin iai bteng ban leh ia kane bad kane ka dei ka jingiakren kaba ngi la iakren”.
“Hooid ki don kiwei ki ishu kiba hap iakren bad ki Ministry kiba ngi la dep iakren bad ngi la ioh ia ka jubab kaba sngewtynnad la ka dei ha ka Tnad Pule Puthi ba iadei bad ka CUET lane ka CIF na ka Finance Ministry” ula ong
Haba kylli la ka Sorkar kan buh jingkyrpad pyrshah ia ka hukum ba dang shen jong ka Iingkashari Meghalaya High Court ban phah ia ki CISF ba kin tehlakam ia ka jingkhaii beain ia u dewiong, u Myntri Rangbah ula ong “Ka Sorkar ka dang bishar ia kane bad kan sa shim ia ka rai ha kine ki khyndiat sngi ban wan”.
Halor ka jingkam u Myntri Rangbah ka Assam ba ka Mukroh ka dang hap sha Assam, u Conrad ula ong “Ngi la kren shai naduh ka sngi ba nyngkong ba ka Mukroh kam dei satia ka jaka ba iakajia. Ka Mukroh ka dang hap hapoh u pud u sam ka Meghalaya bad kane ka dei ka nongrim ba ngi ieng bad ngi la kren shai naduh ka sngi ba nyngkong”.
Haba iadei bad ka hukum ka Iingkashari ban pynbeit noh ia ka kam ba iadei bad ka jingpynkynriah ia ka Them Metor, u Myntri Rangbah ula ong “Ngin sa rai ynda kala poi sha ka Sorkar…ai ba ka High Level Committee (HLC) kan pyndep ia ka kam”.
