Shillong Kyllalyngkot 16: Ka Nongkseh Sports Social & Cultural Club kala jam shaphrang bad ioh rung sha ka Semi Final jong ka 11th All India Chief Minister’s Gold Cup International Football Tournament da kaba pynliem da 4-0 ia ka NEROCA FC na Manipur ha ka jingiakhun kaba la long hynne ka sngi Thohdieng ha Jorethang, Sikkim.
Ka Nongkseh kala iakhun ia ka Quarterfinal khlem ka jingdon u kapten u Hardy Cliff Nongbri uba la mynsaw na ka jingiakhun kaba la dep, ha kaba ula shah suh arksai na ka shyntur. Hynrei wat hapdeng ka jingbym don u kapten, hynrei ki rangialehkai ka Nongkseh kim shym la duh mynsiem hynrei kila iakhun tyngeh naduh ka khyllipmat ba sdang ka jingiakhun ha ka kylla step.
Ki rangialehkai ka Nongskeh kila ioh ban thep ia ka kol kaba nyngkong lyngba u Banpynkhrawnam Nongkhlaw kaba la wan lyngba ka jingshut ia ka corner kick.
Kane ka kol kala ai mynsiem shuh shuh ia ki nongialehkai ka Nongkseh ban bteng ban ialehkai bad hashwa ban kut noh ka kylla step u Fullmoon Mukhim uba la ialam shipor ia kane ka kynhun kum u Kapten ula ioh ban pynai ia ka bol kaba biang bha ia u Kynsaibor Lhuid bad khlem ka jingpynleh noh ei ula ioh ban thep ia ka kol bad ka Nongskeh kala tam da 2–0 ha ka kylla step.
Ka Nongskeh watla kala ioh thep 2 kol, kam shim la khein sting hynrei kala iai bteng ban ialehkai bha ha ka kylla miet bad na ka jingbakla u nongap kol ka NEROCA FC ha kaba kala lait ka bol na ka kti ka jongu, kumta u Batskhem Thangkhiew uba la don hajan ula ioh ia kakabu kaba biang ban thep da kaba suk ia ka kol.
Kane ka kol kala nang pynjem khnap ia ka NEROCA FC katba ka Nongkseh kala bteng ban tur shakhmat bad kala ioh ban thep ia ka kol kaba 4, lyngba u Sheen Stevenson Sohktung ha kaba u Chanmitre Thma uba la ioh mih bujli ha ka kylla miet ula ioh ban pashat ha ka rukom kaba biang bha ia ka bol ha u Stevenson.
Ka jingialehkai bha jong u Stevenson Sohktung kala pynlong syndon ia u ban ioh ia ka khusnam Man of the Match.
Ka Nongkseh kala long ka kynhun kaba skhem ha kane ka jingiakhun, ha kaba u Daraphun Talang kum u nongap kol ula leh ia ka bynta ban iada ia ka bol ban ym ioh rung shapoh kol ia kaba la kyrshan ia u da ki nongap bak kiba kynthup ia u Arlangky Nongsiej, Banpynkhrawnam Nongkhlaw, Banshkem Mawlong bad Mickyson Tangsong, kaba la pynthikna ia ka Nongskeh ban nym shah thep kol ha ki artylli ki jingiakhun kiba la dep.
Ka Nongkseh mynta kan iakhun ia ka Semi Final pyrshah ia ka Red Panda FC na Sikkim ha ka 18 tarik u Kyllalyngkot ha ka por 2 baje nohphai sngi.
