Guwahati, Lber 05 : Ka Kynhun United Opposition Forum (UOF) ki 16 Party ba ialam da ka Congress ha Assam, ha ka sngi Ba-ar kila pan por ban iakynduh ia u Myntri Rangbah Duh ka Ri Narendra Modi ha ka jingwan iuhkjat ha Assam ban pyntip ia u halor kiei kiban jia lada pyntreikam ia ka Citizenship (Amendment) Act lane CAA ha Assam.
U Myntri Rangbah Duh ka Ri un wan iuhkjat bad pynlut por arsngi ha Assam ha ka 8 bad 9 tarik u Lber. Kane ka jingwan jong u ka dei na ka bynta ban plie ia ki project bapher bapher bad un sahmiet ruh shimiet ha Kaziranga National Park.
U President ka UoF Bhupen Kumar Borah bad u General Secretary Lurinjyoti Gogoi, ula phah da ka shithi sha u PM Modi lyngba ka emai halor kane ka kam.
“Ngi na ka bynta ka United Opposition Forum ka Assam, bala thaw bad 16 tylli ki National bad Regional Party, ki kyrpad ia phi ban aipor lem ha kaban iakren bad iakren halor ka jinglong jingman ha Assam dang shen kaba mih na ka jingpynbna jong u Myntri kam Pohiing Amit Shah ban pyntreikam ia ka CAA ha Assam shuwa ka elekshon Lok Sabha 2024” ong ka shithi bala phah sha u Modi hynne ka sngi Ba-ar.
“Kumba phi tip ba ki paidbah ka Assam, ki seng sain pyrthei bapher bapher, ki kynhun seng bapher bapher kila pyrshah jur ia ka CAA naduh ka sngi ba wanrah ha Parliament. Ha u Nohprah 2019 bad ki sdang bnai jong u 2020 shuwa ban lynshop ka khlam Covid, ki paidbah ka Assam kila pynlong ia ka jingiakhih da ki bnai ban dawa pyndam ia ka Act bad ha kane ka jingiakhih, haduh 5 ngut ki samla kila iap bad da kot spah kiba mynsaw na ka jingther kuli ki Pulit” kala bynrap.
Ka UOF kala pynpaw ruh ba kum ka Liang Pyrshah kaba don jingkitkhlieh, ka sngewdei ban kren ia kane ka jingsngew u paidbah pyrshah ia ka CAA ka ban buh jingma ia ka kolshor, ka histori, ka ioh ka kot bad ka snap kyrpang jong ki paid Assamese.
Shuwa kane, ka UOF ha ka 29 tarik Rymphang kala iakynduh ia u Lat ka Jylla Gulab Chand Kataria bad kyrpad ia u ban pynbeit ia ka jignialang bad u PM Modi ha kaban pyndam ia ka CAA.
