Shillong, Risaw 03: Ka Cherry Blossom Festival kala pynbna ba u Diplo yn wan ban pynshongshit ia ki paidbah ha ka sngi ba-ar jong kane ka tamasa.
U Diplo uba la ioh khur 3 sien ia ka Khusnam Grammy Award, yn pynshongshit ia ki paidbah ha ka jingtem DJ ka jongu bad udei uwei napdeng ki 10 ngut ki DJ kiba pawnam tam ha kane ka pyrthei bad la thikna ba ki jingtem bad ki sur kiba mih na ka jingtem DJ ka jongu kin pynkhih win ia ki paidbah ban shad bad khih ka met ka phad ka jongki.
Ha ka Sngi Nyngkong jong ka tamasa, yn pynbyrngia bad pynshongshit ia ki paidbah da ki nongrwai ba pawnam ha ka pyrthei kiba kynthup ia u Jason Derulo bad ka kynhun tem kaba la tip kum ka ‘The Script’ ha kaba yn synrang lang ka Nora Fatehi kum ka nongshah khot kyrpang.
Ki nongpyniaid ia katei ka tamasa kan sa nang wanrah shuh ia ki nongrwai bad kynhun tem kiban pynbyrngia ha ka sngi baar jong katei ka tamasa ia kaba yn sa pynbna kham hadien.
Ka Cherry Blossom Festival kan long ha ka 14 & 15 u Naiwieng ha JN Stadium & Polo Ground, Shillong bad ia ki Tickets lah ban ioh mynta na ka bynta ka sngi ka baar ne Day 2 ha ka dor kaba long ha ka wat kaba nyngkong, da kaba leit ha RockskiTickets.com
Ki paidbah ki lah ban thied noh ia ka tiket jong ka sngi ka baar jong ka tamasa ban shimkabu ia ka dor kaban ym neh slem shuh. Wat nym duh ia ka kabu ban ioh mad ia ka jingshongshit jong katei ka tamasa ka ba heh.
Ka Cherry Blossom Festival kala nang pawnam ha u snem ba la dep ha kaba kala jam shaphrnag ban ia kiwei pat ki tamasa bad Concert hapoh ka ri India kaba kynthup ia ka Sunburn bad Martin Garrix’s India tour, da kaba ioh khur 4 tylli ki Gold Awards ha Wow Asia, kynthup ia ka khusnam ‘Festival of the Year’ bad ‘Entertainment Event of the Year’.
