Shillong, Nailar 14: U Myntri ka tnat jngohkai Bah Paul Lyngdoh, ha ka sngi Balang, ula pynbna baka Sorkar Jylla kan iatreilang bad ka Sorkar Japan ban pynlong ia ka Cherry Blossom 2024.
Haba kren sha ki lad pathai khubor u Bah Lyngdoh u la ong ba kane ka dei ka jingai jingmut kaba la ai da u Ambassador Japan sha India ha ka por ba u la wan jngoh ia ka nongbah Shillong ha u snem 2023.
“U nongmihkhmat jong ka Japan u la sngewtynnad bad itynnad ia ka jingiasyriem jong ki syntiew Cherry kiba thung hangne bad ki syntiew Cherry ha Japan bad kumta u la ai jingmut ba ka Japan ka dei ban long shibynta ha kane ka tamasa bad kane ka long kum ka jingiakylliang hapdeng ka Meghalaya bad ka Japan” ong u Bah Paul.
“Kaba kham pher ka Cherry Blossom mynta u snem ka long ba ngin iatreilang ruh bad ka Sorkar Japan bad kan don ka jaka ba la buh kyrpang na ka bynta ka Sorkar Japan ban pyni ia ki kam bapher bapher jong ki ha ki bynta bapher bapher kaba ka ri ka la paw bha” u la ong.
U Bah Paul ula pyntip ba nalor ka Cherry Blossom, ka tnat ka dang pynkhreh ia kiwei pat ki prokram bad ki tamasa na ka bynta ka Cherry Blossom 2024.
“Ngin sa shim por katto katne namar kin don ki prokram bad ki tamasa ki ban long ha ki district bad katto katne ha ka Jylla bad katto katne kin long ha ki shnong” u la bynrap.
