Shen yn sa Charge Sheet sa ia ki 3 ngut tang shu ioh kaiphod na ka Forensic
Shillong Nailur 06: Ki pulit jong ka East Khasi Hills ha ka sngi Thohdieng kila Chargesheet ia ka Sonam Raghuvanshi ryngkat bad ia ki 4 ngut kiba la donkti ha kaban pyniap ia u Raja Raghuvanshi ha Arliang Riat Kunongrim, Umblai hajan ka Wei Sawdong, Sohra.
U Superintendent of Police (SP) ka East Khasi Hills u Bah Vivek Syiem ula pyntip, ba ha ka 21.05.2025, u Raja Raghuwanshi bad ka kurim ka jongu ka Sonam Raghuvanshi kiba na Indore Madhya Pradesh kila wan sha Shillong bad kila leit sha Sohra kum ka Honeymoon Trip ka jong ki.
Ha ka 26.05.2025, la pyntip ba kitei ki shi kurim kila jah klep na Sohra bad kumta la pynlong ia ka jingwad ia ki bad hadien katto katne sngi jong ka jingwad da ki pulit ka Sohra, SOT, NDRF, SDRF, ki kynhun Trekking bad ki nongshong shnong ka thain, kila lap ia ka metiap jong u Raja Raghuvanshi ha ka 02.06.2025, na ka riat kaba don ha Arliang Riat Kunongrim, Umblai hajan ka Wei Sawdong, Sohra.
Halor kane ka jingjia, la rejistar hapoh ka Sohra PS ia ka Case No. 07/2025 u/s 103(1)/238(a)/309(6)/3(6) jongka BNS Act.
U SP ula pyntip ba katkum ka jinglong jingman jong katei ka jingjia, la thaw ia ka Special Investigation Team (SIT) kaba kynthup ia u Bah Herbert Kharkongor MPS Superintendent of Police (City), East Khasi Hills, u Bipul Das, MPS, Dy. Superintendent of Police (Crime), u Simseng. A. Sangma, MPS, Dy. Superintendent of Police (Ops), Bah Kyrmen Shabong, MPS, Dy. Superintendent of Police (City), u S.I Bah Anthony Khongsit, I/O jong ka case bad 2 ngut ki Sub-Inspector jong ka Special Cell.
Hapoh 7 sngi jong ka jingtohkit 5 ngut kiba suba donkti kiba kynthup ia ka Sonam Raghuvanshi kaba la donkti ha kaban pyniap ia la u kurim u Raja Raghuvanshi la lap ba kala don sha Madhya Pradesh bad Uttar Pradesh.
Hadien ba la pynlong ia ka jingtohkit kaba bniah, kynthup ia ka jinglum ia ki sabut bad ia ki sakhi satar, la shem ba ka Sonam Raghuvanshi kala don ia ka jingiadei bad jingieid bad u Raj Kushwaha ha kaba u Raj ula pynwandur ia katei ka buit sniew bad ka Sonam ryngkat bad 3 ngut ki nongpyniap briew ban pyniap ia u Raja Raghuvanshi kum ka jingwan Honeymoon sha Sohra.
U SP ula ong, ia kane ka jingpyniap la leh da u Aakash Singh Rajput, u Vishal Singh Chauhan bad u Aanand Kurmi hakhmat ka jingdonlang jongka Sonam Raghuvanshi ha Arliang Riat Kunongrim, Umblai hajan Wei Sawdong.
Haba tohkit shuh shuh, la kem sa ia ki 3 ngut kiba la suba donkti lang kiba kynthup ia Lokendra Tomar, u Balla Ahirwar bad u Shilom James na Gwalior, Shadora bad Dewas halor ka jingpynduh pyndam noh ia ki sabut.
U Bah Vivek ula pyntip ba ki pulit kila dep ban aiti ia ka Charge Sheet kaba 790 sla ryngkat bad ki sabut bad ki sakhi hapoh jong ka iingkashari ka Judicial Magistrate 1st Class, Sohra Sub- Division Court ha ka sngi Thohdieng.
Ki kyndon ain kiba la pynngat ia kitei kiba la shah suba pyniap briew kiba kynthup ia ka Sonam Raghuvanshi, Raj Singh Kushwaha, Vishal Singh Chauhan, Aakash Singh Rajput bad u Aanand Kurmi hapoh jongka 103 (1)/238 (a)/61(2) jong ka Bharatiya Nyaya Sanhita, 2023.
Ki pulit kin sa aiti ruh sa ia kawei ka Charge Sheet pyrshah ia ki 3 ngut kiwei pat tang shu la ioh ia ki kaiphod na ka Forensic.
