Shillong, Naitung 07 : U MDC ka BJP na Tura Bernard N Marak, ula byrngem ban ujor da ka ejahar pyrshah ia ki nongshalan tiar NREGA bad kumjuh ki dukan die tiar namar ka jingkynnoh ba ki khate haduh 50%-60% na ka pisa bala mang ban shalan tiar.
Ha ka kyrwoh bala pyllait hynne ka sngi U Blei, u Bernard ula ong “Ki nongshalan tiar NREGA bad ki dukan die tiar kila khate haduh 50% ka pisa bala mang sha ka jingpynpoi ia ki tiar na ka bynta ki kam ba pyntrei da ki shnong ki thaw. Kane kala jia bha ha kiba bun ki C&RD Block ka Ri-lum Garo”.
“Katto katne na kine ki nongshalan kila ong ba kila khate ia ka pisa namar ki hap ban siew ia ki nong ialam sain pyrthei bad ki heh ophisar na ka pisa bala mang. Kane ka dei ka daw ba balei kiba bun ki shnong kim shym la lah ban pyndep ia ki kam hapoh ka por bala buh” ula kynnoh.
Haba kyntu ia ki paidbah ba kin pyntip ia kum kine ki jingjia, u Bernard ula ong “Nga kwah ban kyrpad ia ki paidbah kiba la shah khate 50-60% ka pisa ha ki nongshalan tiar bad ki dukan ba kin pyntip sha ka Ophis jong nga bad ngin sa ujor ejahar pyrshah ia kine ki briew. Ngin sa pyntip sha ka Ophis u CM bad u Deputy Commissioner halor kine ki kam bamsap”.
