Shillong, Naitung 07 : U MLA ka BJP na South Shillong Bah Sanbor Shullai, ula pynpaw ia ka jingsngew bynniaw halor ka jingshah pyniap dusmon ki 4 ngut ki briew ha Umpleng kaba pynpaw ba ka jinglong jingman ka suk ka sain ha Jylla ka dei ka kam kaba hap khmih bha mynta.
U bah Sanbor ula kyntu ia ka Sorkar Jylla ba kan nym pyndem ialade ha kino kino ki jingtynjuh. Ka Sorkar ka dei kaba la shah jied ban pynthikna ba ka shongsuk shongsain ka dei ban ieng rasong ha ka imlang sahlang bad ka dei ban trei ia ki kam kumba la ai ka jingkitkhlieh.
U bah Sanbor ula pynkynmaw ia baroh ki nongshongshnong bad ki bor Sorkar, ba ym don mano manor uh kiba long halor jong ka ain, mano mano ruh kim don ia ka hok ban shim ia ka ain hala ka jong ka kti. “Kam don satia ka nongrim ha kane ka pyrthei ba lah ban pynksan ia ka jingpyniap ia uwei pat u briew” ula bynrap.
Une u MLA ula kyrpad ia baroh ki kynhun ba kin kiar na ki kam umsnam bad ban aiti ia kino kino ki kam bymman sha ki Pulit, khnang ba ka jingbishar ba hok kan ieng.
Ha kajuh ka por, u bah Sanbor ula ai ka jingiaroh ia ka jingtreikam ki Sengbhalang ban iakhun pyrshah ia u droks bad kiwei kiwei ki jingeh kiba ktah ia ka imlang sahlang bad u ai ia ka jingkyrshan ba pura ia kino kino ki sienjam ban weng ia ki jingeh ka imlang sahlang ha ka lynti kaba jai jai.
