Shillong, Naiwieng 01: Ka seng Hynniewtrep National Youth Movement (HNYM) hynne ka sngi ba-ar, kala pynbna ban sdang iaka jingiakhih daka ba leit shong kyllain mungor hakhmat ka Meghalaya Secretariat naduh ka 4 tarik mynta u bnai.
Ka HNYM kala shim ia kane ka rai hadien ba jingaipor ia ka Sorkar ban thaw ia ka policy thungkam ba 80% ia ki samla trai Jylla, kala kut noh ha ka 30 tarik u Risaw.
Haba kren sha ki lad pathai khubor u President ka HNYM bah Louis Dohtdong ula iathuh ba ka seng naduh 20 tarik u bnai Risaw kala phah jingthoh shaka sorkar ryngkat bad ka jingdawa ban thaw iaka Policy thungkam ba 80% iaki samla trai jylla haki kompani shimet hynrei haduh mynta naka liang ka sorkar ka dang leh kyllut ia kane ka jingdawa.
“Kane ka jingleh kyllut ka sorkar kala pyndom iaki samla bad dei namar kane ka seng naduh 4 tarik kan leit shong kyllain mungor hakhmat khyrdop Secretariat” la ong u bah Louis. U bah Louis ula ong ba ki jingiakhih kin dang bteng biang sa haka 7 tarik bad lada ka sorkar ka dang iai leh kyllut, ka seng ruh kan dang pynjur shuh shuh iaki jingiakhih ha ki sngi ban wan.
Haba kylli, u Bah Luis ula ong ba ka seng ka tip baka ophis Deputy Commissioner (DC) kala pynjari ia ka kyndon 144 CrPC ban khanglad iaka jingialum briew, hynrei lada ka sorkar kam khein snep iaka jingdawa ki khun samla, ka seng ruh kam khein snep iaka ain jong ka DC lane ka sorkar.
