Shillong, Iaiong 03: Ki shipai bala shongthait ne ki Ex-Servicemen kiba don hapoh ka lama jong ka Meghalaya Ex-servicemen League ba kynthup ruh ki shipai barim kum ki Gorkha, Khasi, Mizo bad Kuki hynne ka sngi Nyngkong, kila pynbna ba ki lah ban pynlong da ka jingiakhih ban pyrshah jur halor ka jingshah leh shilliang khmat ha kaba iadei bad ka bai bam tymmen lane ka One Rank One Pension (OROP).
Haba kren sha ki lad pathai khubor u General Secretary ka Meghalaya Ex-Servicemen League u Buam Myrthong ula iathuh ba baroh ki shipai barim lane ex-servicemen ka jylla kila shim ia ka rai ban ai jingkyrshan ia ki ex-servicemen ki ba dang don hapdeng ka jingiakhih ha Delhi ban pyrshah jur iaka jingleh shilliang khmat ha ka OROP-I.
U bah Myrthong u iathuh ba u Myntri Rangbahduh ka ri u Narendra Modi ula shim ia ka rai ban pyntreikam iaka OROP-I ha u snem 2014 hynrei kila don bun ki mat kiba ki ex-servicemen kila mad jingeh naduh u snem 2014 kaba la pynlong syndon ia ki ban mih bad ban pynlong iaka jingiakhih ha Delhi ban dawa pynbeit thymmai biang iaka OROP-II.
Ula iathuh ba ka don ka jingnoh shilliang haka OROP namar ka don ka jingiapher haduh T.40,000 haduh T.50,000 hadpeng kawei ka kyrdan hapoh jongki shipai bad namar ba kala don ruh ka jingkiew jong ki marbam mardih man la ka sngi, kam long ka bym iahap bad ka jingioh jong ki ex-servicemen kiba la ai ka jingshakri ia ka ri.
“Katei ka jingiakhih ka long ban pyrshah iaka jingnoh shilliang jongka OROP-I bad ban dawa pynbha iaka OROP-II bad kane ka jingiakhih kam dei satia kaba jia tang ha Delhi hynrei la sakhi ruh wat ha kiwei kiwei ki jylla jong ka ri. Kila don kiba la leit sha Delhi ban iashimbynta ha katei ka jingiakhih naka bynta ka bha ka miat jong baroh ki ex-servicemen” la ong u bah Myrthong.
U bah Myrthong ula ong, mynta kala iaid 42 sngi ba ki ex-servicemen kila pynlong ia ka jingiakhih ha Jantar Mantar, Delhi hynrei haduh mynta ym shim la ioh ia kano kano ka jubab naka sorkar pdeng ban shimkhia halor ki mat jingdawa jong ki ex-servicemen.
Ula ong, ha ka OROP II, ka Sorkar Pdeng ka don jingthmu ban ai kajuh ka jingsiew ia baroh kiba don ha kajuh ka kyrdan bad kiba don ha kajuh ka snem ha ka kam ai jingshakri ka jong ki.
