Shillong, Nohprah 05: Ki nongtrei ka tnat DHS kiba shah thungkam kum ki Frontline Workers haka por ba lynshop ka khlam COVID, hynne ka sngi Ba-ar, kila byrngem ban pynlong daka jingshah thngan ba khlem pud naduh ka 15 tarik Nohprah lada ka Sorkar kam pyllait noh iaka tulop hapoh 11 tarik mynta u bnai.
Kine ki Nongtrei kila shim ia kane ka rai namar ka jingshah set tulop mynta la 6 bnai bad kila rai ruh ban pynlong daka jingshah thngan naduh 15 tarik hakhmat ka khyrdop Main Secretariat.
Haba kren sha ki lad pathai khubor u bah Kasparlin Iawphniaw ula iathuh ba hynne ka step kila kynduh ia Director ka tnat DHS bad haka jingialang la pyntip ba naka liang ka DHS kala pyndep iaki jingdonkam bad mynta kaba sah ka long satang naka tnat Finance ka Sorkar Jylla ban pyllait iaka tulop.
U Bah Kasparlin ula iathuh ba haka por ka khlam COVID, ka tnat DHS kala thung haduh 180 ngut ki briew ban trei kum ki Emergency Care Staff haki Hospital ban iakhun iaka khlam bad ha u bnai Nailur mynta u snem, kaTnad ka la pynkut noh iaki kam ba ki trei hynrei iaka tulop naduh u bnai Iaiong 2023, ka Sorkar ka khlem pyllait.
“Mynta ka sngi ngi la rai ban ai por iaka Sorkar hapoh 11 tarik mynta u bnai ban siew iaka tulop jong ngi, bad lada kam lah ban siew noh, ngin pynlong iaka jingiakhih daka ba shah thngan naduh 15 tarik mynta u bnai hakhmat ka khyrdop Main Secretariat Shillong” ong u Bah Kasparlin.
Haba kylli u Bah Kasparlin ula ong ba naka liang ki nongtrei kim kwah shuh ban iakren bad ka Myntri ka tnat ka koit ka khiah lane Director ka tnat DHS hynrei ki kwah beit ban iakren bad u Myntri Rangbah ka Jylla ban dawa pyllait noh ia ka tulop, kaba kila shah set haduh 6 bnai.
U Bah Kasparlin ula ong “Ka long ka jinglehrain ban tip baka tnat ka koit ka khiah ka Sorkar Jylla ka dang don haduh T.40 klur hynrei kam lah ban siew iaka tulop jong ki 180 ngut ki nongtrei kiba la iakhun pyrshah ka thma khlam COVID kaba kot tang kumba T. 2 klur”.
