Shillong, Nailar 02: Ki Nongtrei ka Mawkyrwat Civil Hospital, South West Khasi Hills, kila byrngem ban khangdam noh ia ka jingshakri jong ka OPD bad ka Emergency Service hapoh ka Hospital naduh ka 5 tarik u Nailar, 2024.
Kine ki Nongtrei ki kynthup naduh ki Doktor, ki Nos, bad kiwei kiwei. Ia kane ka rai la pyntip ruh lyngba ka shithi sha ka Director of Health Services (MI), Shillong, kaba la phah ha ka 1 tarik Nailar.
Kat kum kane ka shithi, kine ki Nongtrei kila rai ban shim ia kane ka sienjam namar ka jingtreikam khlem tulop (shah set tulop) naduh u bnai Jymmang 2024 kat haduh mynta mynne.
Kila pyntip ba ka jingkhang ia ka jingshakri ki OPD bad ka Emergency Services hapoh ka Hospital, kan sdang treikam naduh ka por 9 baje mynstep.
Ki Nongtrei ha kane ka shithi, kila pyntip ba kila pan jingtip ia kane ka jingbym ioh tulop naduh u bnai Jymmang lyngba ka shithi ba la phah ha ka 23 tarik Naitung, 2024 hynrei ki khlem pat ioh satia ia kano kano ka jubab kaba ai jinghun ia ki.
Ia kane ka shithi la phah ruh sha ka Myntri ka Koit ka Khiah ka Jylla Kong Ampareen Lyngdoh bad kiwei kiwei.
